شهر تقبل التوحد: 12 شغلة لازم تعرفها عن حالة التوحد

ملاحظة: مجتمع التوحد طلب من الإعلام إنو يوقف استعمال كلمة “توعية” ويستبدلها بـ “تقبّل”، لأن القصة مش بس إنو نعرف عن التوحد، بل نخلق بيئة شاملة وداعمة للأشخاص اللي عندن توحد.

التوحد (Autism Spectrum Disorder – ASD) هو حالة عصبية ونمائية بتختلف من شخص لشخص. بعض الأشخاص بيلاقوا صعوبة بالتواصل الاجتماعي، وغيرن عندن حساسية زايدة على الأصوات أو اللمس، وكل شخص عندو تجربتو الفريدة مع التوحد.

وهودي 12 شغلة لازم تعرفها عن حالة التوحد ب شهر التوحد:

1. الأشخاص اللي عندن توحد بيحسّوا وبيشعروا متل أي حدا تاني

في فكرة خاطئة إنو الأشخاص اللي عندن توحد ما عندن مشاعر، بس هيدا مش مظبوط! بالعكس، عندن كل المشاعر متل أي شخص تاني، بس البعض ممكن يواجه صعوبة بتعبير عنن بسبب حالة اسمها “أليكسيثيميا” اللي بتصعّب عليهن فهم مشاعرن أو وصفها بالكلام.

2. أول مدرسة خاصة من نوعها بلبنان للتوحد اسمها “1,2,3 Autism School”

هالمدرسة بتوفّر دعم علاجي وتعليمي متخصص للطلاب اللي عندن توحد، مع علاجات متطورة متل الـ ABA (تحليل السلوك التطبيقي) لتساعدن يتطوّروا وينجحوا. وكمان بتوفّر دعم كتير مهم للأهل.

3. الجمعية اللبنانية للتوحد موجودة من 23 سنة

هالجمعية بتدافع عن حقوق الأشخاص اللي عندن توحّد بلبنان، وبتشتغل لتأمّنلن الخدمات والدعم اللازم. أسستها السيدة أروى الأمين حلوي، أم لطفل عندو توحّد، بعد ما لاحظت قديش في نقص بالدعم والخدمات بهالمجال.

٤. ما في سبب مباشر للتوحد.

لليوم، ما في أي بحث علمي حسم شو هو السبب الرئيسي لحالة التوحّد.

5. الأشخاص اللي عندن توحد مش غريبين ولا صعبين بالتعامل

هني ببساطة مختلفين، متل كل شخص عندو طريقته الخاصة بالتعبير والتفاعل مع العالم.

6. احتياجات وقدرات الأشخاص اللي عندن توحد بتتغير مع الوقت

في ناس بتتحسن مهاراتن الاجتماعية والتواصلية مع العمر والتدريب، وفي ناس تانية بتضل عندها تحديات معينة. كل شخص هو حالة خاصة وما في قاعدة وحدة بتنطبق عالجميع.

7. هيدي قضية حقوق إنسان

الأشخاص اللي عندن توحد بيتعرضوا للتمييز والنظرة الخاطئة من المجتمع. من حقن يحصلوا على خدمات صحية وتعليمية متوفرة وداعمة، لأن هيدا جزء من حقهن بالعيش بكرامة متل أي فرد تاني.

8. الأشخاص اللي عندن توحد ممكن يكونوا مبدعين بشكل استثنائي

كتير منن عندن مواهب بالفن، الموسيقى، المسرح، والرقص، وبيعبروا عن حالن بطرق مذهلة.

9. الأطفال اللي عندن توحد فيهن يروحوا على مدارس عادية

مش كل ولد عندو توحّد بحاجة لمدرسة متخصصة. مع شوية دعم متل وجود أخصائيين أو مساعد بالصف، كتير ولاد فيهن ينجحوا بمدارس عادية.

10. الأشخاص اللي عندن توحد عادة عندن أنماط سلوكية متكررة

هالأشخاص عندن عادات ونظام بيريحن، وإذا تغيّر هالنظام فجأة، ممكن يحسوا بقلق وضيق. هيدا شي لازم الأساتذة والأهل يكونوا واعيين عليه.

11. معدل التوحد عالمياً هو طفل واحد من كل 100 طفل

حسب منظمة الصحة العالمية.

12. الدولة لازم تتحمّل مسؤوليتها أكتر

ما لازم الجمعيات والمؤسسات الخاصة يكونوا وحدن مسؤولين عن دعم الأشخاص اللي عندن توحّد. الدولة لازم تكون جزء أساسي من الحل، وتأمن خدمات شاملة ومجانية أو بأسعار مقبولة لكل العائلات.

التوحد مش مرض، ومش لازم حدا يحاول “يعالجو” أو “يغيّرو”. هو ببساطة جزء من تنوع البشرية، وكل شخص عندو توحد بيستحق الدعم والتقبل والحب متل أي حدا تاني.

شوفوا كمان: كل شي لازم تعرفوا عن باصات النقل المشترك بلبنان: الخطوط، التكلفة، الدوام!