بين ألف زيتونة… مطعم بالجنوب بيخطف القلب!

بقلب جنوب لبنان، وتحديداً بين تلال ضيعة الكفور، مخبّى دار الزيتون متل الجوهرة، مكان بيلتقي فيه سحر الريف اللبناني مع اللقمة الإيطالية. هالمطعم اللبناني والإيطالي، محاوط بألف شجرة زيتون معمّرة، بيقدم تجربة مميزة بتاخدكن ع الريف بكل جمالو وتفاصيلو.

لما تطلع ع الجنوب، ما فيك إلا تزور دار الزيتون! المطعم بحد ذاتو تحفة فنية. الديكور التراثي بياخدك ع زمن تاني، مع أنتيكا، لوحات فنية، وتحف بتعطيه جو مميز وعتيق.

المشاهد الطبيعية بهيدا المكان بتخليك تحس إنك بقلب لوحة. إذا قررت تقعد برّا، القعدة بين أشجار الزيتون، تحت السماء الزرقا، والهوا الطلق بيخلقوا جوّ من الراحة والسكينة.

من ناحية الأكل، دار الزيتون بيقدملك مزيج من الأطباق اللبنانية والإيطالية. بتبلش بالمشاوي والمازة اللبنانية، وبتكمل بأطباق متل الباستا الطازجة المحضّرة بإيد، أو البيتزا المعمولة ع الحطب. ومع كل لقمة، بتحس وكأنك عم تعيش قصة حب بين لبنان وإيطاليا، خاصةً مع المنظر الطبيعي يلي ما إلو مثيل ع كروم الزيتون.

بس التجربة ما بتخلص هون. دار الزيتون كمان هو دار ضيافة فيه 12 غرفة بتفاصيل عتيقة وراقية. الغرف مصممة لتخليك تعيش بجو لبناني أصيل. بتصحى ع منظر الزيتون وبتنام ع نسمات الجنوب، في أحلى من هيك؟

ابتداءً من خريف 2025، رح يقدّمو أنشطة بتقربك أكتر من الأرض والتراث: من تحويش الزيتون وتجربة عصره، لجولات بالطبيعة حول الوادي، وصولاً لورشات تعليم الخبز التقليدي، الدبكة، وحتى جلسات يوغا تحت الشجر وبين النسيم. 🫒 🌳 ☀️ 🌿

📞 للحجز أو الاستفسار: 163 763 76

 📱 تابعوهن على إنستغرام: @darelzaytoon 

شوفوا كمان، فنانين الجنوب رجعو، هالمعرض فتح من جديد بالنبطية!