عم تكب زبالتك ع الطريق؟ حضّر حالك لضبط بـ100 دولار!

بخطوة لافتة ومهمّة، بلدية عاليه قررت تحط حدّ لفوضى النفايات، وفرضت غرامة 100 دولار لكل شخص بيرمي زبالة ع الطرقات.

رئيس بلدية عاليه، وجدي مراد، قال لموقع mtv: “احترنا شو بدنا نعمل” مع الناس اللي ما عم تلتزم وعم تكبّ نفاياتها بكل محل. ورغم إنو البلدية دايمًا بتنبه وتنضف، بس المشكلة ما كانت عم تنحل، فقرروا يتحركوا.

مراد شرح إنو البلدية ركّبت كاميرات، وبلّشت تتابع الناس يلي عم تكبّ النفايات، وعم يتم التواصل معن ليدفعوا الضبط. وإذا السيارة كانت مش من المنطقة، بيتسجل الضبط ع رقم السيارة. قيمة الضبط: 8 مليون و900 ألف ليرة، يعني حوالي 100 دولار.

وأشار إنو الغرامة المالية يمكن تكون الطريقة الوحيدة لحتى يتغيّر هالسلوك، وقالمراد بصراحة بعض الأشخاص “ما بيوعوا إلا إذا حكّينالن جيبتن”.

وبحسب مراد، هالغرامات رح تدعّم صندوق البلدية وتساعد بجهود التنضيف. وهيدي بس البداية، لأنو البلدية بلّشت تشتغل ع الأرض: عم تنضف الطرقات، وزادت عدد عمّال النظافة، واللافت إنو الناس بلشوا يلاحظوا الفرق ويتفاعلوا مع الفكرة بإيجابية.

طالما الطرقات بعدها عم تتحوّل لمكبّات، تجربة عاليه لازم توصل لكل ضيعة… ومنتمنّى نشوف هالوعي البيئي بكل المناطق!

وانتو خبرونا بالتعليقات، لازم تتطبق ع كل المناطق؟

شوفوا كمان، حديقة للعيلة وسوق زراعي بصيدا، تعرفوا ع هالمحل!