قرض الإسكان صار 100 ألف دولار، وهيدي الشروط المطلوبة!

بخطوة طال انتظارها، وافق مجلس الوزراء أخيرًا على رفع سقف قرض الإسكان من 50 لـ100 ألف دولار. هالقرار فتح باب التملّك قدّام عدد كبير من اللبنانيين، خصوصًا الشباب من ذوي الدخل المحدود والمتوسط.

ومع الارتفاع الكبير بأسعار الشقق والعقارات، خاصة بعد الحرب، ما عاد الـ50 ألف دولار يكفوا لا للشراء ولا حتى للترميم. من هون، طالب الرؤساء الثلاثة برفع السقف، وقدّم الوفد اللبناني طلب رسمي خلال اجتماع مع الصندوق العربي، وكانت النتيجة اليوم.

شو أعلن مصرف الإسكان؟

حسب الموقع الرسمي لمصرف الإسكان:

“يمنح مصرف الإسكان ش.م.ل. قروضاً طويلة الأجل بالدولار الاميركي لغاية سقف 100.000 $ لتمويل شراء أو بناء مسكن ولغاية سقف 50.000$ لتمويل ترميم مسكن مع إمكانية تركيب نظام طاقة شمسية ومحطة تكرير لمعالجة مياه الصرف الصحي، ضمن قرض “الترميم والبناء””.

شو هي شروط قرض الإسكان الجديدة؟

صرّح المدير العام لمصرف الإسكان، أنطوان حبيب، إنو الشروط الأساسية للقرض بعدها متل ما هي، وأهمها إنو ما تتعدى مساحة الشقة 150 متر مربع، وتقديم مستندات ضرورية متل الإفادة العقارية، ورخصة الملكية، ورخصة السكن أو البناء (بحسب نوع القرض).

 (فيكن تشوفوا كامل الشروط ع موقع مصرف الإسكان هون)

أما التعديل الوحيد فبيتعلق بمدخول المقترض: لازم يكون الدخل الشهري الصافي لطالب القرض بين 2,500 و5,000 دولار أميركي، ليتأهل لقرض سكني بقيمة 100,000 دولار، مع التأكيد إنو القرض بينعطى ويتسدّد بالدولار.

القروض دخلت حيّز التنفيذ من نهار الإثنين الماضي، وكل حدا حابب يستفيد، بيقدر يقدّم طلبه عبر المنصة الإلكترونية لمصرف الإسكان. أما طريقة التسديد ونسبة الفوايد فبتختلف حسب قيمة القرض.

هالخطوة ممكن ترجع تحيي حلم التملّك عند كتار من اللبنانيين، وتفتح صفحة جديدة بوجه الشباب يلي ناطرين فرصة سكن كريمة ومستقرّة.

شو رأيكن بهالقرار؟ وهل بتشوفوا إنو كافي بهالظروف؟

شوفوا كمان

مسبح الجامعة اللبنانية فتح للصيفية، وهون التفاصيل!