الأكل الزايد بالمطعم مش للكب…صار فيكن تطلبوه وبنص السعر هون!

في كتير مطاعم ومحلات بلبنان، خاصةً آخر النهار، ما بيلحق ينباع عندها كل شي، بس الطعمة بعدها طازة وبتستاهل فرصة. ومن هون إجت فكرة “دايمة Daymeh”، مشروع لبناني جديد بيجمع بين محاربة هدر الأكل ودعم المطاعم المحلية بطرابلس.

الفكرة بسيطة وذكيّة: بتفوتوا ع موقع Daymeh هون، بتشوفوا شو الأكياس المتوفرة من أشهر المطاعم، بتحجزوا الكيس يلي عجبكن، وبتدفعوا بـ Wish Money. بعدين بتروحوا ع المحل، وبتستلموا الكيس! كمان بيكونوا حاطين أي ساعة بيصير متوفر الكيس الجديد!

شو يعني كيس مفاجأة؟ يعني المحل بيعبّيلكن شغلات زايدة عنده بهاليوم، متل صحن باستا، قطعة حلو، ساندويش، أو شو ما يكون، بس كلّن طازة وبعدهن بيستاهلوا ينأكلوا. أحلى شي إنو السعر فيكن تربحوا فيه حسم بيوصل لـ 50٪ أو أكتر.

“دايمة” مش بس بتساعد المطاعم تخفف من خسارتها، كمان بتعطي فرصة للناس تكتشف نكهات جديدة من أماكن يمكن ما كانوا مجرّبينها قبل. وفوق كل هيدا، عم نخفف هدر الأكل.

الفكرة مستوحاة من مبادرات عالمية ناجحة متل Too Good To Go ببريطانيا، فرنسا، وأمريكا، وهلّق صار وقتنا نجرّبها هون. أوّل مدينة رح تستفيد من هالمشروع هي طرابلس! ومنتمنى نشوفها بباقي المناطق قريباً.

يعني إذا كنتوا بطرابلس، جهّزوا حالكن لتعيشوا تجربة بتجمع بين التوفير، الأكل الطيب، والمفاجأة الحلوة. ما تنسوا تابعوا حسابن ع انستغرام هون، و للتواصل عبر الواتساب هون.

شوفوا كمان، عندكن مناسبة؟ احجزوا Eddy’s لأفضل catering وأطيب ستريت فود