منتجع تزلج جديد مرتقب بلبنان…شو قصة هالمشروع؟

عشاق التزلج بلبنان بلشوا يحكوا عن مشروع Summit Ski، منتجع جديد بقولوا إنو بيبعد 30 دقيقة بس عن بيروت. شو قصته؟ وشو هي التحديات لهيك مشروع بلبنان؟

(للتوضيح: اليوم نهار الاثنين الصبح، اخدتنا 30 دقيقة من الحمرا…للحمرا.)

عن مشروع Summit Ski

المنتجع المعلن عنه هو مشروع فاخر من شركة المر. مخطط إقامته على قمم منطقة الزعرور، على منحدرات بتوصل لارتفاع 2001 متر فوق سطح البحر. صفحتن ع مواقع التواصل بتغريكن بصور الشاليهات، رياضة الباراغلايدينغ، كوكتيلات بعد التزلج… وأكيد ملاعب البادل موجودة كمان.

بس قبل ما تخططوا لرحلتكن الشتوية عند Summit Ski، في شغلة مهمة عن هالمشروع لازم تعرفوها.

عوائق بيئية؟

رداً على استفسار من جمعيّة الأرض لبنان، أكدت وزيرة البيئة تمارا الزين بتاريخ 12 آب 2025 إنو المشروع الحالي ما انعمله أي دراسة لتقييم الأثر البيئي أو فحص بيئي مبدئي. هيدي خطوة إلزامية لأي مشروع من هالنوع حسب المرسوم 2012/8633.

الوزارة كمان شددت إنو ما في أي بناء ممكن يتقدم إلا إذا تم الالتزام بكل الشروط القانونية والبيئية. المشكلة بتصير مقعدة أكتر لما نرجع لخطة استعمال الأراضي الوطنية بالمرسوم 2009/2366، يلي بتصنّف أي أرض فوق 1,900 متر كـ “قمم طبيعية”. بهالمناطق، البناء محظور تقريباً، إلا بحالات نادرة متل المناطق العسكرية.

ليه الموضوع مهم؟

جبال لبنان صارلها فترة عم تتعرّض للتعديات من قبل بعض أصحاب المشاريع الخاصة: قطع غابات، رمي نفايات، وبناء غير قانوني… وكل هالشي من دون أي محاسبة. من المقالع والكسارات غير المرخّصة اللي بتاكل بالمنحدرات، للمنتجعات اللي بتحفر وسط الجبال، القانون البيئي غالبًا مش فعّال، والغرامات ولا شي مقارنة بالأرباح.

بدون ضغط مستمر من جمعيات الرقابة متل جمعيّة الأرض لبنان وخطة تطبيق فعّالة، مشاريع مثل Summit ممكن تنضم لليستا طويلة من المشاريع يلي عم تتعدى على البيئة.

شو الخلاصة؟

مع الامل إنو يتم هيدا المشروع بس حسب الشروط اللازمة يلي بتحمي البيئة والأرض.