من الرقيقة للمليانة جبنة… 17 محل بيتزا ببيروت لازم تجربوهن!

كل ما يجي عبالنا بيتزا، منحتار بين العجينة الرقيقة الكلاسيكية أو البيتزا المليانة جبنة ومكونات دسمة. كرمال هيك، جمعنالكن بهالدليل أطيب محلات بيتزا بقلب بيروت لكل الأذواق: إذا بتحبوا القطع السميكة والدايبة أو البيتزا الأصيلة المحضّرة عالحطب.

تأكدوا تبعتوا هالمقال لرفيقكن يلي بيحب البيتزا!

إذا كنتوا بدكن تجربة إيطالية أصيلة:

1. MRKT، أسواق بيروت

مطعم عالمي بيدمج بين الأكلات التقليدية والنكهات العالمية، MRKT بيقدملكن مكان عفوي ودافي، مناسب لغدا خفيف أو لضهرة بالليل مريحة.

2. Eataly، أسواق بيروت

إدخلوا على عالم المطبخ الإيطالي العالمي: مطعم مع قعدة، كافيه، وسوق إيطالي فاخر تحت سقف واحد. بيقدموا بيتزا على الطريقة النابولية مع موتزاريلا وبوراتا طازة، بالإضافة لأجود المواد الغذائية الإيطالية.

3. PizzAria، مار مخايل

محل مميز وعفوي مشهور بالبيتزا ع الحطب ومكونات عالية الجودة، أجواء بتخليكن تحبوا تقعدوا فيه سواء للغدا أو العشا.

4. Sorelle Beirut، مونو

بيقدمو أكلات إيطالية بيتوتية بمطرح شيك ورايق، مثالي لعشا طويل مع أصحابكن.

5. Pizzeria Del Vico، الأشرفية

بنص الأشرفية، Pizzeria Del Vico بيعملوا بيتزا عالحطب بتجنّن. فيكن تتلذذوا بطعم هالأكلات الشهية من بيتكن كمان.

6. Mario e Mario، مار مخايل

هالمطعم الإيطالي معروف إنو لطيف و بيتوتي، و عندن جو حلو مع قعدة تراس مميزة. ومن ضمن المنيو بيتزا طيبة و تشكيلة من الأطباق الإيطالية التقليدية.

7. Tavolina، كذا فرع

معروف بالبيتزا على الحطب، الباستا الإيطالية الكلاسيكية، الريزوتو، وجو دافي ومريح على الطريقة الإيطالية. مكان مثالي إذا عم تفتشوا ع بيتزا بعجينة رقيقة ووجبات فيكن تتشاركوها مع أصحابكن.

8. Pizza Enzo، بدارو

بيتزا محضّرة بكل حب واهتمام، مع خيارات مميزة متل موتزاريلا دي بوفالو وبيتزا الترافل شغل بيت.

9. Appetito Trattoria، الجميزة وزيتونة باي

عندن كذا فرع ومعروفين بتقديم منيو إيطالي روعة. بيضم بيتزا طيبة متل الكابريتشوزا مع تقديم المكونات الإيطالية الكلاسيكية بطريقة مميزة.

10. Tom&Mutz، مار مخايل

جوّ المطعم مرتب ومريح، مع مطبخ مفتوح لتشوفوا فيه تحضير البيتزا لايف. البيتزا ع الستايل الإيطالي-الأمريكي، مليانة مكونات طيبة وطعمها وجودتها عالية.

11. كومو، لانكستر إيدن باي

المطعم مثالي لغدا عفوي، أو قعدة وقت الغروب، أو حتى أكلة دسمة بنص الليل. وبيقدّم الأكلات الإيطالية التقليدية اللي منعرفها ومنحبها كلنا.

12. Bavaglino، درج مار نقولا

محل إيطالي دافي على درج مار نقولا، بيقدملكن بيتزا، باستا، وريزوتو ع الأصول. هيدا المحل المحبوب هو الخيّار المثالي لعشاق الأكل الإيطالي.

13. Vafa، الأشرفية

بعد ما فتحوا، بس عم يلمّحوا لمطعم بيتزا وبار كوكتيل جديد بالأشرفية.

إذا كنتوا بتحبوا البيتزا الدسمة بجو مريح

14. Pizza Secrets، كورنيش المزرعة

محل بيحبوا كل عشاق البيتزا المليانة بالجبنة والمكونات القوية، وكمان بيتزا الخاصة بالمحل متل “سيكريت باتر”، وكل شي بيقدموه بأسعار معقولة وبستايل محلي.

15. New York City Pizzeria، مار مخايل

حصص كبيرة، أكل مريح ع الستايل الأمريكي مع بيتزا كبيرة كتير (72سم!)، بطاطا بالترافل، وغيرها. محل مثالي وقت بدك تدلع حالك.

16. Pizza Guys، الجميزة

هالمكان معمول لعشاق العجينة الرقيقة: قطع بيتزا مقرمشة ورقيقة، وخيارات متنوعة من مكونات كلاسيكية وغريبة.

17. بيتزا فاكتوري، حارة حريك

هيدا المكان ما بيتفوت لعشاق البيتزا اللي بحبوا ياكلوا ع راحتن. عندهن بيتزا لكل الأذواق، ومثالي للمشاركة إذا كنتوا مجموعة أصحاب وعم تدوروا ع شي تاكلوه بعد سهرة بالليل.

خبرونا، أي محل بيتزا المفضل عندكن بقلب بيروت؟