اكتشفوا الحمرا… 9 أماكن رح تنغرموا فيها!

بدكن تقضوا نهاركن بقلب أشهر شوارع بيروت؟ هيدي كل النشاطات اللي لازم تجربوها و أماكن لازم تزوروها بقلب الحمرا!

إذا عم تدوروا على أكل مريح: جرّب كل شي بـThe JaJa

مطعم الدجاج المحبوب بالحمرا نزّل منيو جديد، وعنجد بيستاهل التجربة. نحنا شخصياً مرقنا وجربنا كل شي، إذا بدكن تتعرفوا ع الأطباق يلي دقناها (وحبّيناها)، شوفوا التقييم تبعنا هون!

هيدا المحل مثالي للناس يلي بيحبوا السناكات اللبنانية الكلاسيكية والمريحة، بيقدّم مجموعة متنوعة من السندويشات والبرغر لتستمتعوا فيهن وقت بتحسوا عبالكن تغيروا جو. مننصحكن تمرقوا مع رفقاتكن، تطلبوا وجبات كبيرة، وبعدها تتشاركوها مع بعض.

للمزيد من المعلومات، تأكدوا من إنستغرام تبعن! بيفتحوا كل يوم من الساعة 12 الضهر للساعة 10 المسا.

بس إذا بدكن تروحوا غدا مع العيلة: مننصحكن تجربوا Bana Café بالوج. بيقدّموا لمساتهن الخاصة على أطباق لبنانية فريدة، ومتأكدين حتى كل إم لبنانية رح تحبّن.

إذا بدكن نشاط مسلّي: خلو إبداعاتكن تطلع بـ Dream Factory

للأشخاص اللي بحبّوا يرجعوا يعيشوا روح الطفولة، Dream Factory هو المكان المثالي. بهيدا الكافيه الإبداعي، فيكن تعملوا تجربة Build-A-Bear، تصمّموا tote bags، وتستمتعوا بعدد كبير من النشاطات الفنية مع أصحابكن.

مين قال إنو هالنشاطات بس للولاد؟ بالعكس، هيدي طريقة حلوة لتروّقوا أعصابكن بعد أسبوع طويل. المحل موجود بشارع الحمرا الرئيسي، مقابل سانديوش ونص.

إذا بدكن تشتروا شي أنتيكا: لاقوا كنوز جديدة وقديمة عند Hamra Vintage

أجمل القطع القديمة اللي رح تحبّوا تضيفوها لمجموعتكن! مجوهرات فريدة، شنط قديمة، أغراض مستعملة بحالة ممتازة، كاميرات للأفلام، وحتى record players بعدن شغّالين...في كتير إشيا تكتشفوها بهيدي الجوهرة.

وإذا بتعرفوا هالمحل من قبل، صار عندن محل جديد حد Plaza Pharmacy. اكبسوا هون لتعرفوا وين صار.

إذا عبالكن تقعدوا لحالكن: فتشوا ع كتاب جديد عند Book Bazar

عشّاق الكتب رح يوقعوا بغرام Book Bazar. المحل موجود مقابل Sushi Bell، وتحوّل مؤخرًا لكافيه للكتب!

عندن وحدة من أكبر مجموعات الكتب المستعملة بلبنان، يعني فيكن تشتروا كتب بأسعار كتير حلوة. وإذا بتحبّوا الكتب القديمة والنادرة، أكيد رح تلاقوا شي يعجبكن.

إذا بدكن تدوقوا شي حلو: جربوا دوناتس من Bakerloo

تجربة ضرورية لكل شخص عندو حب للحلويات. Bakerloo بيقدّم من أطيب الدوناتس بالمدينة، وكمان عندن ابتكارات غريبة شوي بتستاهل التجربة.

رجعوا نزّلوا مؤخرًا دوناتس نوتيلا مع زعتر، ومع إنو ما جرّبناها بعد، بس عملت ضجّة كبيرة السنة الماضية.

إذا بدكن شي بعد أحلى: جرّبوا frosted cinnamon rolls من Espressolab

يلي بحبّوا يشربوا قهوتن مع شي حلو، Espressolab هو المكان المثالي لتقعدوا شوي، يمكن تشتغلوا أو ترتاحوا. المكان واسع، أكيد بتلاقوا زاوية هادية لحالكن.

الـ cinnamon rolls بينمزجوا مع القهوة الطازة عندن. خبرونا شو طلبكن المفضل من Espressolab!

إذا كنتوا بتحبوا المسرح: روحوا ع سينما Le Colisée المرمّمة

السينما العريقة Le Colisée صارت مليانة بعشّاق الأفلام والمسرح من وقت ما رجعت وفتحت بالحمرا، وعم ترجّع مجد بيروت الذهبي. خدو أصحابكن وروحوا شوفوا شو عم ينعرض.

فيكن كمان تزوروا المكان بس لتشوفوا كيف تغيّر بإيدين الرائع قاسم إسطنبولي وجمعية Tiro Arts.

لتقروا أكتر عن الموضوع Le Colisée، اكبسوا هون.

إذا بدكن قعدة جنينة: خلوّا الخبرية بسيطة بمشوار على كافيه يونس

أديه منروح عـ Café Younes بالحمرا وما منزهق؟ الكافيه عندو حديقة بتجنّن، قهوة مختصة، أكل طيب، وأجواء هادية بتخليكن تهربوا شوي من ضجة المدينة.

المكان والقعدة رح يغيروا مزاجكن دغري!

حبيتوا مشوارنا ع الحمرا وأحلى المحلات فيها؟