التوك توك ممنوع بجبيل…قرار جديد من البلدية!

مدينة جبيل أخدت قرار جديد لافت بيتعلّق بالتوك توك. رئيس بلدية جبيل – بيبلوس أصدر قرار بيمنع دخول التوك توك عالمدينة، إلا إذا كان مسجّل رسميّاً عند هيئة إدارة السير وبيحمل لوحات نظامية.

القرار إجى بعد ما صار وجود التوك توك ملفت بشوارع جبيل، خاصةً إنو هالنوع من المواصلات ما بيناسب الطابع الهادي والتراثي للمدينة. التوك توك وسيلة نقل مش آمنة للركاب لأنو ما فيه تجهيزات سلامة ولا حماية كافية. غالباً بيكون بلا تسجيل أو تأمين، وبتسبب إزعاج للناس. 

يعني نقل الركاب بالتوك توك أو توقّفه بالأماكن العامة صار ممنوع كليّاً. بس البلدية تركت مجال محدود لاستخدامه بحالات خاصة، متل دليفيري أو نقل بضاعة للمطاعم والمحلات التجارية، شرط يلتزموا بكل معايير السلامة، ويكون معن كل الأوراق القانونية اللازمة.

وكمان، القرار شدّد على أمور تانية مهمّة. ممنوع تشغيل موسيقى صاخبة، أو تركيب فوميه ع القزاز، أو حتى الإضاءة القوية من نوع LED Projectors. الهدف من كل هالقرارات هو المحافظة على صورة جبيل المرتّبة، يلي دايماً بتستقبل السيّاح والزوار.

شرطة البلدية تكلّفت بتطبيق القرار ورح تنظّم محاضر ضبط بحق أي مخالف. وهيدي مش أول مرة البلدية بتاخد قرارات تنظيمية، من قبل اعتمدوا قوانين لتنظيم شط جبيل العام، وبعدها قوانين للسوق القديم.

باختصار، التوك توك ممنوع بجبيل إلا بحالات محدودة وواضحة، لتبقى المدينة نموذجية متل ما منعرفها: مرتبة، منظّمة، ومريحة للمشاة والسياح.