سناك حاج نصر ردّ ع دعاية سندويش ونص بدعاية أهضم!
قبل فترة، سندويش ونص عمل حملة اعتبرها كتير ناس من أجرأ الحملات الإعلانية بلبنان! وأد ما كانت جريئة، سناك حاج نصر قرر يرد عليها.
بدل الصورة المثالية المعتادة، قرر سندويش ونص يكون صريح! يعترف إنو في مطاعم تانية عم تبدع بأكلات معيّنة، وإنو هو براند عم يجرب، يتعلّم، ويتطوّر ليصير من الأفضل. هالأسلوب المختلف حسّس الناس بالصدق وخلق علاقة أقرب وأخف دم مع الجمهور.
وحدة من أكتر اللحظات يلي لفتت الإنتباه هي لما كتبوا الإعلان: “أطيب كفتة من بعد الحجّ”. كانت إشارة للمحل العريق حاج نصر، المعروف بعرايس الكفتة من سنة 1975. الإعلان كان واضح وصادم بنفس الوقت، بس إجى بروح لطيفة وداعمة للمطاعم المحلية، وخلّى الناس تحكي وتضحك وتشارك.
المفاجأة كانت مؤخراً لما ردّ سناك حاج نصر بنفس الروح الذكية: إعلان تحت الإعلان السابق كتبوا فيه “كلكن ذوق يا جماعة”، ومعه تعليق على إنستغرام: “يلي بيشوفنا بعين، منشوفو بتنين. كلكن ذوق يا جماعة. غمرتونا بصراحتكن!”
هالرد خلى الخبرية تصير أهضم، لأنه بيورجي إنو المنافسة ما لازم تكون عدائية، وإنو الذكاء بالتسويق مش بس بالشعارات، بس كمان بردّة الفعل. بين صراحة سندويش ونص وخفّة دم حاج نصر، شفنا مثال نادر عن كيف البراندات اللبنانية فيا تكون قريبة من الناس، محترمة، وبتفهم لعبتها صح.
هيك دعايات صادقة ومختلفة بتجذب انتباه أكتر من أي شي!
وإنتو، شو رأيكن بردّ حاج نصر على سندويش ونص؟
