من قصة نزوح لمبادرة حلوة…هالمطعم عم يقدّم برغر لأهلنا النازحين!
بوقت عم يمرق فيه لبنان بظروف صعبة، وآلاف العيل اضطرت تترك بيوتها بلحظة خوف بسبب القصف والإنذارات، بتظهر قصص إنسانية صغيرة بتذكّرنا أديه الشعب اللبناني بيوقف حد بعضو.
من بين هالقصص، قصة سيدة نازحة من الضاحية كانت عم تحكي كيف كانت العيلة مجتمعة حوالين سفرة الإفطار برمضان. جو بسيط ودافي، وعم يحضّروا برغر بالبيت ليفطروا. وفجأة، تغيّر كل شي… واضطرّوا يتركوا بيتن بسرعة، بلا ما يلحقوا ياخدوا شي معهن. الملفت إنو رغم كل شي، السيدة كانت عم تمزح والبسمة مش مفارقة وجها بمشهد بيعبر عن القوة والصمود.
هالقصة وصلت للشيف ماريو حداد، يلي تأثّر فيها كتير وقرّر يحوّل هاللحظة المؤثرة لخطوة فيها دعم وأمل. من قلب مطبخو بـ EYT Burger، حضّر ووزّع حوالي 250 برغر لبناني لأهلنا النازحين بهالفترة الصعبة.
هالمبادرة كانت رسالة تضامن ومحبة، وتأكيد إنو بعد في ناس واقفة حد بعضها بهيك ظروف. والأجمل إنو أي حدا فيو يكون جزء من هالفكرة: أي صاحب مطعم، محل أكل، أو حتى شخص حابب يساعد فيه يتعاون مع الشيف ماريو!
بتلاقوا مطعم EYT Burger بالحازمية، ما تنسوا تابعوه وتدعموه هون.
