عيدية مصففة شعر للبنات النازحين…تعرفوا ع إيمان

وسط كل هالوجع يلي عم نعيشه، بتطلع مبادرات صغيرة بتترك أثر كبير بقلوب الصغار… متل يلي عملته إيمان بصيدا. إيمان، مصففة شعر عندها صالون Ezees، قررت تعطي من وقتها وموهبتها لتزرع شوية فرح بقلوب بنات نازحين، بعاد عن بيوتن وعن أجواء العيد يلي تعودوا عليها.

حملت إيمان أغراضها وتوجهت ع وحدة من مدارس صيدا. رغم الظروف الصعبة، كانوا عم يضحكوا ويتطلعوا على حالن بالمراية بفرح. يمكن لأول مرة من فترة، حسّوا بشي طبيعي، شي بيرجعهن لأيام العيد ببيوتهن، بين أهلهن وأصحابن.

بهيدي الظروف، العيد مش متل قبل. في بُعد، في غياب، في خوف، وفي حنين كبير لبيوت انتركت وناس خسرناها. يمكن إيمان ما غيرت الواقع الكبير، بس أكيد زرعت السعادة بقلوب هالبنات. وهيدا الشي بحد ذاته… عيدية ما بتتقدّر بثمن.

شوفوا كمان:

حلاق جنوبي عم يقدّم حلاقة ببلاش للولاد النازحين