بعد ما دمّرته الحرب، ساعدوا فنانة لبنانية ترجع تبني استوديو بالجنوب
أباجور كان استوديو مميز للفن وورش الفخار بالجنوب. من بعد ما دمره العدوان، صار الوقت نوقف حدّ وفاء، الفنانة الجنوبية يلي بَنت من الصفر مساحة فنية كانت أكتر بكتير من كافيه أو استوديو.
Abajour Studio كان أول مساحة متخصصة بالفخار والخزف بضيعة الزرارية. مكان جمع الولاد، الشباب، و الفنانين تحت سقف واحد ليكتشفوا مواهبن، يعبّروا عن حالن، و يتعلّموا الفن.
هون، كانت تنعمل ورش فنية، دروس فخار، و نشاطات ممتعة، لحد ما صار ملجأ للإبداع و الراحة بوجه كل الظروف الصعبة بالجنوب. وحتى فتح كافيه حتى يشاركوا الناس أحاديث و قعدات حلوة.
وفاء حطّت كل قلبها، جهدها، وتعب سنين بهيدا المشروع لتخلق مساحة آمنة وفنية بضيعتها، تعطي أمل وفرصة للناس، خاصةً للجيل الصغير. لكن خلال الحرب الأخيرة، تعرّض أباجور استوديو للقصف وتدمّر بشكل كبير، وخسر الجنوب مساحة كانت تنبض بالحياة والفن.
اليوم، في حملة لجمع 10,000 دولار لمساعدة وفاء تسترجع جزء من خسارتها وتبلّش بإعادة بناء هالمكان المميز بعد ما تخلص الحرب. كل مساهمة، مهما كانت صغيرة، بتقرّب خطوة نحو رجعة بيت للفن، للإبداع، وللناس.
دعمكن مش بس عم يساعد بإعمار استوديو، بس عم يحيي حلم، وعم يرجّع مساحة كانت مصدر فرح وأمل لمجتمع كامل.
للتبرع:
عبر Whish ع الرقم: 685 160 70
عبر Venmo للاسم: Samah-Mazraani
رابط التبرع عبر Fundahope هون.
ساعدوا وفاء ترجع تبني Abajour Studio، لأنو الجنوب بحاجة للفن، ولأنو الأحلام ما لازم تروح تحت الركام.
ما تنسوا تابعوا ع حسابن هون.
