بتعرفوا إنو في سوق مزارعين كل سبت بطرابلس؟
سوق المزارعين بطرابلس صار محطة أساسية كل سبت، ومش بس للناس يلي بتحب الأكل الطيب… Tripoli Urban Farmers Market هو تجربة بتحسسكن بخيرات أرضنا وبأديه في ناس بعدها عم تزرع وتتعب بمحبة.
بحديقة الملك فهد العامة، كل سبت من الساعة 9 الصبح لـ2 بعد الضهر، بتعيشوا أجواء حيوية وحلوة. من أول ما توصلوا، ريحة الأكل الطيب، عجقة الناس، والبسطات بيخلقوا جو مميز بيشبه روح طرابلس والشمال.
أحلى شي بهالسوق إنو المزارعين نفسن موجودين. بيستقبلوكن، بيخبروا عن منتجاتن، وبتشتروا من المصدر مباشرة.
بتلاقوا خضرة وفواكة موسمية طازة، مونة لبنانية أصيلة من مختلف المناطق، خاصة من الشمال — من عكار لإهدن. عسل بلدي، زعتر، مربيات، مونة بيتية، خبز ساوردو وبريوش طازة، وصاج ومرقوق معمولين بإيدين بتشتغل بمحبة.
والسوق مش بس للمونة والأكل… في كمان أشغال حرفية ويدوية، مستحضرات طبيعية، ورد، هدايا، وقهوة طيبة تشربوها وإنتو عم تتمشّوا بين البسطات. وحتى الولاد إلن حصتن، مع وجود ملعب بالحديقة ليقضوا وقت حلو.
Tripoli Urban Farmers Market مش مجرد سوق… هو مساحة بتجمع الناس مع أرضها، وبتقرّبنا من المزارعين يلي بعدن متمسكين بالأرض رغم كل الظروف. هون، التسوّق بصير دعم مباشر للمنتج المحلي، ولناس عم تحاول تحافظ على الزراعة والحياة الريفية ببلدنا.
إذا بعدكن ما زرتوه، يمكن صار الوقت تكتشفوا هالمساحة يلي صارت عنوان أمل، دعم، وخير كل سبت بطرابلس.
