بضيعة كانت مهجورة… مزرعة حلوة للعيلة بين جبال أدونيس

في مطرح بين جبال أدونيس، بعيد عن ضجّة المدينة، بقلب ضيعة صغيرة كانت مهجورة لسنين، واليوم عم ترجع الحياة تدبّ فيها شوي شوي.

تعرفوا ع مزرعة سنّور:

مزرعة سنّور موجودة بأدونيس، كسروان–جبيل، وبتعتمد على الزراعة التجديدية والأكل الموسمي. بتجمع بين الزراعة، الحيوانات والتعلّم بتجربة بتاخدكن أقرب للأرض، وللقصة اللي بتبلّش قبل بكتير ما يوصل الأكل عالسفرة.

هون فيكن تمشوا بين المزروعات، تشوفوا كيف بتنزرع الخضرة، تقطفوا من الأرض، وتتعرّفوا على المحاصيل بحسب موسمها. وبآخر النهار، بتقعدوا حوالين السفرة وبتدوقوا أكل طازة، جايي من الأرض اللي كنتوا عم تتمشّوا فيها من شوي.

كل موسم إلو قصّته

يمكن أحلى شي بسنّور إنو ما في زيارتين بيشبهوا بعض، لأن التجربة كلها بتتغيّر مع الفصول ومع شو عم تعطي الأرض.

ع مدار السنة، بتنظّم المزرعة أيام وورشات مرتبطة بالمحاصيل والمونة اللبنانية. مرّة بتلاقوا حالكن عم تحضّروا المكدوس، مرّة البندورة أو المربى، وبموسم تاني بيكون الدور للقرع أو الزيتون، يلي هني بموسمن هلق.

هون الأرض هي اللي بتقرّر شو في اليوم. وبحسب الموسم، بتلاقوا بالمزرعة خضرة وأعشاب وفواكة، كمان بيض ومنتجات ألبان موسمية.

نهار للعيلة بالمزرعة

إذا حابين تعيشوا التجربة كاملة، فيكن تحجزوا نهار عائلي بالمزرعة من الساعة 10:30 الصبح للـ5 المسا.

النهار بيبلّش بجولة بين أراضي المزرعة، بعدها بتشاركوا بورشة موسمية، وبتختموا التجربة بغدا بوفيه لبناني. السعر $40 للكبار و$25 للولاد تحت الـ10 سنين.

مزرعة سنّور بتفتح يومياً من 9 الصبح للـ7 المسا، أما زيارات المدارس والمجموعات وأيام الأحد بالمزرعة، فبدها حجز مسبق. التفاصيل بالرابط هون.

سنّور مش مطرح بتروحوا عليه بس لتشوفوا الطبيعة. هو مطرح بتعيشوا فيه إيقاعها: تمشوا بين الزرع، تلمسوا الأرض، تكتشفوا شو عم تعطي بهالموسم، وتقعدوا عالسفرة بعد نهار صار فيه للأكل حكاية مختلفة.

شوفوا كمان:

12 محل جديد بلبنان رح تسمعوا عنن كتير