صار فيكن تستأجروا الذهب بدل ما تشتروا بلبنان

مع الارتفاع الكبير بأسعار الذهب، شراء طقم ذهب كامل للعرس أو للمناسبات صار مكلف ومش بمتناول الكل. بهالفترة، بلّشت تنتشر بلبنان فكرة استئجار الذهب والمجوهرات بدل الشراء.

شو صحة خبر استئجار الذهب بلبنان؟

الخدمة بعدها مش متوفرة عند كل الصاغة، والخبرية بعدها خجولة نسبياً. بس في شوية محلات المجوهرات بلّشت توفّرها للناس اللي بدها تلبس طقم ذهب أو قطعة فخمة لمناسبة معيّنة، من دون ما تدفع سعرها كامل.

من المحلات اللي بتقدّم هالخدمة حالياً مجوهرات نصيحة بسوق الذهب بالبربير، بيروت. وممكن يكون في محلات تانية بتعتمد هالطريقة بس بأسلوب متحفظ، يعني مع الزباين الدايمة اللي في بينن ثقة وتعامل مستمر.

كيف بتصير العملية؟

عادةً بيتحدّد سعر الإيجار حسب قيمة القطعة أو الطقم، وبيكون الاستئجار لليلة أو لمناسبة معيّنة. المحل ممكن يطلب ضمان قبل تسليم القطعة، متل مبلغ تأمين أو رهن بقيمة الذهب، أو مستندات وضمانات تضمن رجوع القطعة بنفس الوزن والحالة ومن دون ضرر.

بهالطريقة، العروس مثلاً فيا تلبس طقم ذهب فخم بليلة عرسها، من دون ما تضطر تدفع آلاف الدولارات لتشتريه. ومع تخطّي سعر غرام الذهب عتبة ال100$، ممكن يكون الاستئجار خيار مناسب يلي همه يلبسوا الذهب بالمناسبة، مش يحتفظوا فيه بعدين.

وإنتو شو رأيكن؟ إذا ما معكن ميزانية كبيرة تشتروا ذهب، بتفضّلوا تستأجروه للمناسبة أو تلبسوا شي أبسط ع قدّ الميزانية؟

شوفوا كمان:

شفت شجرة متضررة بلبنان؟ صار فيك تبلغ عنها!