مشوار على حمانا: قضوا النهار عم تحوشوا كرز عند جنينة جميل

في كتير مطارح ومطاعم فينا نزورها بلبنان لنتسلا مع الأصحاب، بس ما بعرف إذا صرتوا متلنا عم تحسوا حالكن عم تعيدوا حالكن بالضهرات. لهيك قررنا نطلع اليوم مشوار مختلف على وحدة من أجمل الضيع بلبنان: حمانا.

حمانا بتبعد تقريباً عشرين دقيقة عن بيروت، فعطريقن بتمرقوا بضيع الجبل الخلابة. بس توصلوا، تروقوا كنافة من عند العريضي، بتاخد العقل.

كفوا على جنينة جميل وقضوا نهار من العمر – كتير مرتبة ونضيفة وعندن شجر كرز ومناظر كتير مطلة على الضيعة، ما في بنايات حوليها، والكرز وين ما كان.

بتوصلوا بيعطوكن سلات لتعبوا فيهن الكرز وبرافقن حدا على قلب الجنينة ليفسرلكن عن شجر الكرز وطريقة التحويش وبعرفكن على الضيعة شوي. بعض أنواع الكرز بتطلع على الواطي والبعض على العالي بدكن سلم لتوصلولا بس كل شي طيب وطازة.

تجربة كتير مهضومة رح تتسلوا فيها كتير وتاخدوا أجمل الصور بس ما تنسوا تجيبوا معكن مي مسقعة وبرنيطة من الشمسات وأكيد ما تنسوا كمان تلبسوا صباط رياضة.

الفوتة على الجنينة أكيد ببلاش، بس تخلصوا بتحطوا الكرزات على الصندوق وبتزينوهن وبتدفعوا على قد ما حوشتوا.

وإذا عبالكن، جنينة جميل بيعملوا كتير قصص بالكرز متل مربيات ومقطرات ومأكولات، بضل في جو حلو وخدمة روعة.

يلي عبالو يتحلى في مربى الكرز مع خلطة سحرية. ولا أطيب من هيك!

في مثلاً الspecial Cherry BBQ Sauce صوص الباربكيو على كرز، يلي بتجمع خلطات مالحة وحلوي بطريقة كتير طبيعية…مغطاية بالكرز ولونها أحمر. أطيب شي مع الدجاج، البطاطا المقلية والتشيكن ناغتس!

بس تخلصوا، فيكن تختموا نهاركن عند مطعم Cherrylane وتدوقوا عندن الأطباق الطليانية والفرنساوية وترجعوا تتحلوا بالوجبات المعمولة بالكرز.

للحجز والاستفسار عند جنينة جميل: 772 328 70
تشيريلاين: 588 335 71

شوفوا كمان، أحلى كزدورة على فقرا: قعدة جبلية ولقمة بيتوتية.