على صوت الموج: بيت ضيافة ساحر بجونية مع جاكوزي بيرد الروح

أديش فخمة تفيقوا الصبح على صوت موجات البحر؟ ميلوا صوب جونية و حتلاقوا لحظات وقعدات ما بتنتسى. لقينالكن Vila Vita بقلب جونية، بيت ضيافة قاعد على الشط وناطركن على احر من الجمر. كفوا معنا لتعرفوا شو مخبيلكن.

بتلاقوا عند Vila Vita شقتين واسعين مع منظر برد الروح للبحر الأزرق الصافي. بقدملكن كمان بيت الضياف شط خاص لإلكن لتستمتعوا و تنبسطوا بالبحر بكل رياحة وخصوصية.

قعدة التراس كبيرة وبتطل على البحر، فيها جاكوزي، قعدة من القش والخشب، ولمسات مهضومة من اللون الأزرق لتحسوا بالراحة النفسية. فيكن تاخدوا نفس عميق وترتاحوا على هيك منظر بياخد العقل مع ترويقة طيبة بقدملكن ياها المحل أو فيكن تستجموا تحت الشمس وتنسوا العالم.

لما تدخلوا لجوا ح تنسحروا بالتفاصيل والزوايا الحلوة. كل شقة من حجر الصخر وفيها موديل مودرن و قديم سوا، مع نقشات ولمسات من القش ليكمل معكن جو البحر. أوضة القعدة كتير مريحة و مكنكنة، مفتوحة على سفرة خشب مع شبابيك مقنطرة وزوايا فنية و إطلالة بحرية . ولتكمل على الآخر بقدملكن بيت الضيافة حساب نتفليكس لإلكن لتعملوا سهرات لطلوع الضو على أي أفلام بتعجبكن.

إطلالة البحر بتضلها لاحقتكن من غرفة لغرفة وكل منظر أحلى من التاني!

أوض النوم بتعقد! مجهزة بكل شي بدكن ياه، تصميمها من الخشب و مفتوحة على التراس مع الجاكوزي إذا عبالكن سهرة رومانسية غير شكل مع النجوم وعلى صوت الموج.

كل شقة مناسبة من حد الشخصين لل٤ أشخاص. يعني شي مثالي لضهرة رومانسية مع الحبيب أو جمعة رفقة مهضومة أو حتى لعيلة زغيرة حابي تغير جو.

إذا حابين تستفسروا أو تحجزوا، اتصلوا على الرقم: ٨١٥٥٤٠٠٨

شوفوا كمان بيت سمار بالبترون: بيوت ضيافة صخرية بقناطر وقعدة تراس بتخطف القلب