محل جديد ببيروت: شوفوا هالبيت الأثري والمطعم الروعة

كونوا مأكدين إنو هيدا المكان المميز بمنطقة سرسق بالأشرفيه رح يخليكن توقعوا بحب لبنان من أول وجديد!

بيت كنز هو بيت بيروتي عتيق بتبلش حكايته من وقت ما إتعمر بين سنة ال ١٨٨٠ و١٩٤٠. حبت جمعية بيت البركة ترجع هالكنز التراثي و ترمموا بعد ما تأثر كتير بسبب إنفجار المرفأ بال٢٠٢٠.

اليوم بيت كنز هو ملتقى تراثي ومعلم أثري بيحتفل بالتراث اللبناني الأصيل. جايبلكن هالبيت قطع تراثية وكنوز من مختلف أنحاء لبنان بمحل واحد بيحكي قصة وحدة.

وبما أنو هدف المشروع أنو يرجع حضارتنا للحياة، بتلاقوا بمطبخ بيت كنز الوصفات اللبنانية الأصيلة، معمولة بكل حب على إيدين أهل القرى والضيع اللبنانية. حوالي ال١٠٠٠ امرأة من ٥٣ ضيعة لبنانية شاركوا وساهموا بالمشروع، هيدا الشي سمح لكتار من المنتجين وخاصة النساء إنو يقدروا يعطوا بمحبة لبلدنا وأهلوا، وخاصة عن طريق المونة اللبنانية يلي بيعملوها على الأصول وكمان بتقدروا تشتروها من عند بيت كنز.

الكافيه معمول عاللبناني من أزغر تفاصيله لأكبرها، من عفش ونقشات لسرڤيس وصحون، كلها مشغولة على الإيد ومقدمة من فنانين لبنانية ومبدعين من ذوي الإحتياجات الخاصة من مناطق بيروت والشوف وطرابلس.

بهالطريقة بيقدر المشروع يوفر فرص عمل للعيل المستفيدة من بيت البركة، وبيشتغل على دعمن بمختلف المهارات يلي بتمكنن انو يصيروا مكتفيين ذاتياً ويعطوا مجتمعن من طاقتن الإبداعية.

فيكن تشوفوا كيف صارت عملية ترميم البيت من أول وجديد وبكل جمالية بهيدا الفيديو:

زوروا بيت كنز بسرسق لتعيشوا تراث لبنان بكل تفاصيله، وشوفوا الموقع إذا حابين تعرفوا تفاصيل أكتر أو اتصلوا على 81777098

شوفوا كمان، اتعرفوا على ٦ معالم تاريخية منسية ومخباية بقلب بيروت