٦ من أطيب مطاعم الكريب من كل ميلة بلبنان
مين ضرسو حلو؟ مشوا معنا اليوم على ٦ من أطيب محلات بتعمل كريب بكل لبنان.
١. بالبعلبكي، بعلبك
هل محل بحضر أطيب ترويقة وكوكتيل بالمنطقة كلا، بيعمل كمان اختراعات كتيرة بالأكل وكوكتيلات غير شكل. الكريب كتير طيبة والحلو فيها إنو كريمية والقطعة كبيرة بتشبع منيح.
الرقم: 946 454 71
٢. قشطة وعسل، النبطية
بتتفاجأو هونيك بأنواع الكريب المحضرة من قصص طبيعية وأكيد مع أطيب صوص قشطة وعسل، بس أطيب شي تجربوا عندن هيي الكريب عطعمة الأوريو واللوتس لي طعمتا روعة.
الرقم: 641 762 03
٣. كريب جنيال، الأشرفية
بيعملوا كل أنواع الكريب، الحلو والمالح وكل شي بيخطر على بالكن. الكريب عندو كتير طيبة وفيها كتير شوكولا من جوا ومن برا – ضروري تجربوا الكريب على كيت كات أو أوريو وتعيشوا عالم من الشوكولا.
الرقم: 557 615 70
٤. ذا سويت سبوت The Sweet Spot، طرابلس
كل شي عندو كتير طيب، حتى البوظة عندو بكل طعماتها وألوانها ما فيكن تقاوموها! خلطت الطعمات بتحسسكن كأنكن بحلم، دوقوا طعمات الكريب الروعة لي بحضروها متل: طعمة الشوكولا البلجيكية مع صوص شوكولا دايبة على الوج وطعمة اللوتس المشهورة عندن.
الرقم: 112 819 71
٥. كريب شوب Crêpe Shop، فرن الشباك
هل محل بلبي رغبات عشاق الحلو لأنو بحضر الكريب على أصولها، كل طعمات الكريب والشوكولا موجودة. عنجد كأنكن فايتين على مخزن شوكولا، في عندو كل شي، أوريو، لينت، كيندر، نوتيلا، لوتيس، هيرشيز وكل الطعمات الطيبة لي ممكن تستحلوها. عندن شي جديد وغريب لازم تجربوا، بيض مخفوق مع جبنة بقلب عجينة كريب وغيرها من الموالح. والعجينة كتير طيبة وطرية!
الرقم: 614 809 03
٦. كرم اللولو، عين وزين – الشوف
هل محل بيعمل أطيب أنواع الكريب والحلو بالمنطقة كلا. حتى عندو اختراع كوكيز كنافة بطير العقل للأشخاص لي بحبوا الخبصات. أما الكريب عندو فغير عالم، بتجي على طعمة الشوكولا البلجيكي الأصيل مع الفريز والموز، وكمان بتلاقوا شي كتير طيب… كريب على كرامل وجبنة مع فريز على الوج وما تنسوا تجربوا على القعدة الكاندي كراش كريب والكريب على نوتيلا.
الرقم: 225 101 71
فإذا زهقتوا من الروحة على نفس محلات الكريب، ضروري تجربوا هل محلات.
شوفوا كمان: شي مرة مجربين أطيب ساندويش مغربية بلبنان؟
