لقينا ٥ مطاعم بزغرتا مع قعدة بتطير العقل

بكرا جايين على فرصة وأكيد عبالكن تضهروا من البيت وتعملوا شي بسلي فبدل ما يكون عندكن خطط مملة هل مرة، شوفوا معنا واحد من هل ه مطاعم بزغرتا مع قعدة بتطير العقل تروحوا علين.

١. المرداشية صوطو، المرداشية

قعدة على النهر ما بتلاقوها ببيروت ولا بأي محل تاني، الجلسة بالطبيعة بالصيفية حلوة كتير وبالشتا كمان مكنكنة مع منظر طبيعي ساحر مكشوف من الشبابيك الازاز. بقدموا كل أطباق المازة اللبنانية وأطيب المعجنات والمشاوي والكبة الزغرتاوية التقليدية واصلة من الجرن دغري على صحنكن مع حشوة ولا ألذ من هيك. بتاكلوا لقمة طيبة، بتشوفوا المنظر الحلو وبتبلوا ريقكن بفنجان قهوة.

الرقم: 054 668 06

٢. بيت الشيخة، المرداشية

قاعد على نهر المرداشية والقعدة عندو تراثية على الكراسي والطاولات الخشب مع منظر طبيعي ساحر على المطحنة العتيقة والمي عم تجري تحتكن بتحسوا حالكن رجعتوا لفترة الزمن الجميل. متخصص بأطباق المازة اللبنانية والكبة الزغرتاوية بالجرن مع تتبيلة سرية ومشاوي مشكلة وكاس عرق. في أطيب من هيك سفرة؟ بس تخلصوا بتسردوها على فنجان قهوة مع قطعة فواكة.

الرقم: 380 712 70

٣. موندو، بنشعي

مطعم مهضوم متخصص بالمأكولات العالمية البسيطة متل السلطات الشهية وطبعاً ما بدنا ننسى القعدة برا والمنظر عندو بالصيفية بياخد العقل لأن عندو جلسة بالغازون بين الشجر والعصافير. بالشتوية، القعدة جوا دافية ومكنكنة، بتبقوا قاعدين بين شجر الزيتون وعم تشوفوا المنظر الحلو من الشبابيك مدفايين وحتى فيكن تسمعوا صوت الشتي من الشباك وهيك بتصير القعدة رومانسية على المزبوط. قائمة الطعام متنوعة وطويلة: أنواع مختلفة من السلطات، من البرغر والساندويشات، أصناف عديدة بتتقدم مع أطيب الصوصات، الحلو والمشروبات.

الرقم: 796 969 78

٤. مطعم بحيرة بنشعي، بنشعي

هل مطعم يلي بيعمل للناس جولة بالبحيرة وعندو نشاطات مائية نال شهرة حول لبنان وفرح كتار وأكتر شي الولاد. صح بطل فينا نعمل برمة بالمي بالشتوية بس أكيد فينا ندوق الأكل الطيب فوق البحيرة. ما في لزوم نحكي كتير عن هل محل، بس منحب نقول إنو أكلاتن من بين الأفضل بالمنطقة والإدارة والموظفين، والأجواء في لطيفة كتير والهوا كمان شمالي.

الرقم: 500 550 06

٥. نهر رشعين، رشعين

القعدة على نهر رشعين بتبرد القلب، ما حدا بزغرتا بيعرف يحضر المازة والمشاوي متل مطعم نهر رشعين! الكبة النية والزغرتاوية وأصناف تانية عريقة رح يخلوكن تعيدوها بأقرب وقت. الأجواء عائلية وبيستقبلوكن بالترحيب وبحطولكن موسيقى حماسية أو رايقة حسب الجو.

الرقم: 290 415 70

شوفوا كمان، لقينا ٣ مطاعم بعاليه مع قعدة بتطير العقل.