مين أول امرأة دخلت البرلمان اللبناني؟

سنة ١٩٥٣، كان ممنوع على المرأة اللبنانية تقول رأيها بالصندوقة وكان حق الإقتراع والتصويت حكر على الرجال، بعد سنين من النقاش والتطور، عطوها حق الاقتراع والترشح، بس الخطوة ما كانت سهلة وكانت سباقة بالعالم العربي… والشرط بوقتها كان إنها لازم تكون حاصلة على شهادة ابتدائي أو شهادة مدرسية.

^{Credits: Saher Hamd}

بحسب التقرير المرأة أعطيت حق الاقتراع لأول مرة بلبنان بانتخابات سنة ١٩٥٣، بعد إصدار المرسوم الاشتراعي رقم ٦ في ٤/١١/١٩٥٢ والقاضي بتعديل قانون انتخاب أعضاء المجلس النيابي الصادر ب ١٠/٨/١٩٥٠.

^{Credits: Independent}

بس اللبنانيات من يوم يومن ما بيستسلموا. دخلت الست ميرنا البستاني قاعة البرلمان كأول نايب امرأة سنة ١٩٦٣، إلا إنو وصولها بوقتها ما كان عن قناعة تامة من الشعب، بل عبر “الورتة العائلية” للمقعد النيابي عن والدها الراحل. وهيك تكرر المشهد نفسو مع نايلة معوض ونهاد سعيد وغيرهن، يلي تولوا المسؤولية النيابية عن ذويهن وأزواجهن من دون خوض غمار الانتخابات التنافسية.

Credits: alsawt

حاولوا النساء النشاطات كتير يغيروا هالواقع بس ما كان الحظ حليفن بكل الأوقات! كل ما يقترحوا قانون كوتا نسائية بتقوم الدنيا وما بتقعد. ليش؟ لأن حجة البعض إنو الدستور بيساوي بين المرأة والرجل، وما بيحتاج كوتا نسائية تظلم النساء والمساواة بالبلد. بس فعلياً الواقع كان عم بيعكس غير هيك من خلال أعداد النساء المرشحات يلي كان أقل بكتير من عدد الرجال. البعض الآخر بيعبتر، هالأرقام أمر طبيعي نظراً لعدم اهتمام المرأة بالحياة السياسية على قد الرجل.

مع الوقت تغيرت الأمور، وسنة ٢٠٢٠ لأول مرة حكومة لبنان كان فيها ٦ ستات وزرا! بس هل شي شي كافي؟ أكيد لأ! بس الملفت بآخر انتخابات نيابية إنو كان في وجود أكبر لبعض الوجوه النسائية الفعالة بالبرلمان ولي زاد نسبياً مقارنةً بالسنين السابقة.

كل الإحترام لكل ست لبنانية عم بتنضال للبنان سواء على مقعد البرلمان أو براتو وسواء بالعلن أو بالسر!

شوفوا كمان، ٩ أكلات شعبية مناكلها بس يبلش الصيام!