بيت الأشباح: قصر مسكون بالأرواح الشريرة بشمال لبنان

بضيعة رايقة بشمال لبنان، بتلاقوا قصر مهجور معروف باسم “بيت الأشباح”. بقولوا عنو مسكون أرواح شريرة، وعمرو أكتر من 400 سنة.

بتقول الرويات إنو هيدا القصر بالأصل هوي قصر اسحاق بيك طربيه، أحد أكبر الشخصيات بشمال لبنان بالقرن الماضي يلي

تجوز من الست ماري وجابوا تلات ولاد، يمنى ودميا وبنت تالتة توفت ع زغر واندفنت بجوار القصر.

وبحسب تقرير لقناة العربية، كل حدا بزور هيدا القصر بيشعر بوجود غريب في، حتى يلي ما بآمنو بوجود الأرواح بحسوا برهجة بس يكونوا حد البيت. بس يفوتوا الزوار بقولوا إنو بصيروا بيسمعوا أصوات غريبة عجيبة بتشبه أصوات صريخ أو صوت حدا عم بنازع ويتعذب.

البعض بقول إنو الأصوات المرعبة بتنسمع أكتر شي بالليل لهيك ما حدا بيسترجي يقرب منو أو يزوروا بهيك وقت.

حتى شكل القصر من برا بخوف الناس، كتار حاولوا يزوروا بالليل فلوا مرعوبين من دون ما يعرفوا السبب.

كل سكان المنطقة بقولوا عن مسكون من الأرواح والأشباح وبنبهوا الولاد يروحوا عليه أو يقربوا منو.

وبحسب التقرير نفسو هالبيت كان ملك عيلة إقطاعية غنية وكان عندها نفوذ كبير بالمنطقة من ميات السنين وبقولوا إنو أول طابق في كان محكمة بعاقبوا فيها العالم يلي ما كانوا يعملوا يلي بدن يا العيلة.

الملاك الجداد حرقوا أول طابق لأن كانوا يسمعوا صوت حيايا وين ما كان.

وبحسب بعض الرويات بقول التقرير إنو في البعض كانوا يعتقدوا إنو في كنز مخبى بالقصر شي محل والأرواح حاميتو لهيك في أصوات بتطلع منو بس ما حدا كان يسترجي يطلعوا لهل كنز.

بقلب البيت في متاريس يلي بيستعملوها ليحطوا فيها بواريد ويتخبوا ورا الحجر، وحجر الحيطان كتير سميك بيحمي القناصين. وبقلب البيت في كمان بير غريب عجيب ما حدا بيعرف ليش موجود، البعض بقولوا إنو بالمحكمة العتيقة كانو يقطشوا روس الناس ويكبوهن في.

مش بس هيك، قال هالبيت ما حدا قدر يرجع يعمروا أو يرمموا وبقول التقرير إنو المالك الأخير يلي اشترا بالتمانينات كل ما كان يجيب عمال جداد ليشتغلوا في كانوا يهربوا وآخر مرة هربوا حسب الروايات الشعبية لأن حسوا إنو في حدا عم يشبقن بالحجار.

مين ما كان المالك الأصلي وشو ما كانت القصة ورا هالقصر الغريب، ما فينا ما نقول إنو هالقصر من أجمل البيوت الأثرية لأن موقعو بطل على الساحل وعلى البحر.

وهيك مع مرور السنين، صار هيدا القصر يلي كان يعج بالعالم والمناسبات والضيافات والشخصيات المعروفة، قصر مهجور بدون أصحابو وكترت الخبريات الشعبية عنو لي أغلبها مرعبة.

شو أولكن بتصدقوا هالخبرية؟ ما إلكن غير تطلعوا على هالبيت بنفسكن وتعيشوا الإختبار وتخبرونا شو رح تشوفوا وتسمعوا.

شوفوا كمان، بيت جعلوك: معبد روماني منسي بضيعة منجز.