خبرية حلوة: تم إعادة تأهيل حديقة اليسوعية وصارت مفتوحة للكل!

ممكن من أكتر المشاكل اللي منشوفها بالعاصمة بيروت هي النقص الكبير بالمساحات الخضرا! أماكن متل الحدايق العامة وغيرها من مساحات أساسية للسكان. و بالأغلب هيدي الحدايق العامة بتكون مهملة، مغلقة، منسية، وبحاجة لإعادة تأهيل وترميم من أول وجديد لتصير آمنة ونضيفة للعيل والولاد. واليوم من بعد مبادرة حلوة من جمعية بيت البركة، تم إعادة تأهيل حديقة اليسوعية وصارت مفتوحة لكل الناس وسكان بيروت! 

صورة الحديقة قبل التأهيل (موقع العربي)

هالمشروع بلش بمبادرة من بيت البركة وتعاون وتنسيق مع سكان الحيّ. هدفو تأمين مساحة عامة خضرة وآمنة لكل الناس، من العيل وأطفال، و المسنين، وكمان ذوي الإحتياجات الخاصة. 

والشغل لإعادة تأهيل حديقة اليسوعية كان كتير مميز! تم ترميم كل شي من الأرضية، ممرات المشاة، نوافير الميّ، صيانة المقاعد، إضافة إنارة، وإعادة تجهيز الحمامات، وحتى تركيب نظام طاقة شمسية.

المشروع كمان تتضمن زراعة الشجر والشتل. وكمان تنضيف حول الكنيسة الأثرية الموجودة واللي بتحتوي على آثار موزاييك أو فسيفساء من العصر البيزنطي. وممكن أكتر شي رح يبسط الولاد هو الملعب اللي كمان تم صيانته ليصير آمن! 

هيك مشروع لتأهيل مساحة عامة بأكملها بيحتاج لجهود ودعم مادي كبير! وهيدا عد عن صعوبات اللي ممكن تواجه الجمعيات أو أي مبادرات. ولكن منتمنى يتم إعادة تأهيل باقي حدايق و منتزهات بيروت المهملة لأنو مدينتنا وناسنا وولادنا بيستاهلو كل الخير! 

شوفوا كمان،

الجامعة اللبنانية الأميركية LAU فتحت فرع بأمريكا!

محل جديد ببيروت: شوفوا هالبيت الأثري والمطعم الروعة