حكيلي يا جنوب: بيت بيروت بيعرض أرشيف العائلات وقصص من الجنوب
بعد نجاح معرض Allo, Beirut?، عم يرجع بيت بيروت يغوص بالذاكرة الجماعية للبنانيين وبالأرشيفات الشخصية المحفوظة ببيوت العائلات. هالمرة، الضوء مسلّط على جنوبنا الحبيب من خلال معرض جديد بعنوان “حكيلي يا جنوب”.
صور عائلية، رسائل، مستندات، أعمال فنية، وأرشيفات شخصية من قرى الجنوب بتجتمع سوا لتشكّل سجل حي للمكان والذاكرة والانتماء. وبيتضمّن المعرض مجموعة من التركيبات التفاعلية يلي بتستكشف العلاقة بين الناس وبيوتهم والقصص والتواريخ يلي حاملينها معن.
كمان بيتضمّن المشروع خريطة بتقنية augmented reality بتعيد إحياء القرى من خلال الصور والذكريات، فيما أعمال تانية بتتناول مواضيع التهجير والخسارة والدمار. أما تصميم المساحة، فإجا بشكل مقصود وكأنّه غير مكتمل، ليعكس الذكريات المبعثرة وآثار الأماكن يلي تغيّرت بسبب الفقدان والنزوح.
المواد والأرشيفات المجموعة، يلي تحوّلت لأعمال ومعارض، رح تخلق بدورها مساحات جديدة للحوار وحفظ الذاكرة الجماعية.
وما بيقتصر “حكيلي يا جنوب” على الأرشيف وبس، بل كمان بيحتفل بالتراث الجنوبي من خلال مجموعة من النشاطات العامة. وبتاريخ 27 حزيران، رح تستضيف ست سلمى من جنوب لبنان ورشة لتحضير خبز الصاج التقليدي، وبتشارك الحضور المهارات والقصص يلي انتقلت عبر الأجيال.
خليكن على الموعد مع أي فعاليات أو ورشات جاية مرتبطة بجنوب لبنان الحبيب. ولمعرفة المزيد، فيكن تزوروا صفحتن على انستغرام.
وإذا عجبكن هالمحتوى، تصفّحوا قسم #الجنوب على موقعنا للمزيد.
