الإقامة الذهبية بلبنان …بس بنص مليون دولار!
إذا عندك نص مليون دولار ع جنب وعبالك تصير مقيم بلبنان، صار في عرض جديد إلك.
خلص اجتماع لجنة المال والموازنة مع إعلان عن خطط لبرنامج “الإقامة الذهبية” الجديد اللي هدفه جذب المستثمرين، الأجانب، واللبنانيين اللي عايشين برا. هالمقترح بيعطي إقامة خاصة لغير المقيمين اللي بيستثمروا على الأقل 500 ألف دولار بلبنان .
بحسب اللجنة، فيكن تستثمروا بواحد من القطاعات الثلاثة بس لازم تتقيدوا بالقوانين الحالية لملكية الأجانب بالعقارات. لازم تحويل الأموال يتم من برا البلد، ورح تخضع لتدقيقات صارمة لمنع تبييض الأموال.
الإقامة المقترحة كمان رح تشمل امتيازات لأفراد العيلة. بس كل فرد من العيلة بدّه يستفيد من البرنامج رح يكون عليه رسم سنوي ما بيقلّ عن 50 ألف دولار.
اللجنة بتقول إنّ المبادرة هدفها تجيب رساميل جديدة، تخلق فرص عمل، تأمّن إيرادات للدولة، وتشجّع الاستثمار لما تتحسّن ظروف التعافي الاقتصادي والمالي بشكل أكبر.
خبرونا، شو رأيكن عن مقترح الإقامة الذهبية بلبنان؟
