من عكار لمرجعيون، مرورًا بـ75 ضيعة… بتعرفوا درب الجبل اللبناني؟

إذا بتحبّوا الطبيعة و المغامرات، لازم تجربوا درب الجبل اللبناني ولو مرة بحياتكن، أول وأطول مسار للمشي (Hiking Trail) بلبنان. بيمتدّ لحوالي 470 كلم، من عندقت بعكّار بأقصى الشمال، وصولًا لمرجعيون بالجنوب، وبيقدّم رحلة بتعرّفكن على لبنان من زاوية مختلفة تمامًا.

شو يلي بيميّز درب الجبل اللبناني:

الدرب الأساسي طولو حوالي 470 كلم، بالإضافة لأكتر من 150 كلم من مسارات جانبية (Side Trails) وشبكات الدروب المستقلة أو الجيولوجية، يلي بتوصلكن لمعالم طبيعية وسياحية مميزة، متل بالوع بلعا (شلال بعتارا)، محمية أرز جاج، دوما، بشعلة، وبكاسين، وغيرها من الأماكن الخيالية.

خلال الرحلة، رح تمرّوا بأكتر من 75 ضيعة وبلدة، وعلى ارتفاعات بتتجاوز 2,000 متر فوق سطح البحر. الدرب بيقطع جبال لبنان، الغابات، محميات طبيعية، أودية، ينابيع، ومواقع أثرية، ليجمع بين جمال الطبيعة وغنى التراث و الثقافة.

وما بتوقف الخبرية على المناظر الخلابة بس، لأن هالتجربة كمان بتخلّيكن تكتشفوا القرى اللبنانية، تتعرّفوا على أهلها، و تتذوّقوا الأكلات المحلية ببيوت الضيافة و المطابخ التقليدية، يلي بتحضّر أطباق من إنتاج كل منطقة.

اكتشف لبنان: كل درب بدربو!

الدرب مقسّم ل 27 مرحلة، وطول كل مرحلة بيتراوح بين 9 و24 كلم. فيكن تمشوا كل مرحلة بنهار، أو إذا كنتوا من عشّاق المغامرات، فيكن تخوضوا تجربة قطع الدرب بالكامل على مدى عدّة أسابيع.

🥾 محطات درب الجبل اللبناني: من عكار بالشمال لمرجعيون بالجنوب

• منجز – شبكة دروب مستقلة
• عندقت
• القبيات
• القموعة
• القمامين
• كفر بنين
• بقاع صفرين
• حرج إهدن
• قزحيا
• بشري
• بزعون
• تنورين الفوقا – دروب جانبية
  • دوما
  • بشعلة
• العاقورة – دروب جانبية
  • جرد العاقورة
  • إهمج
  • إهمج – بالوع بلعا
  • إهمج – العاقورة
  • محمية أرز جاج
• أفقا
• فاريا (شبروح)
• كفردبيان
• بسكنتا (الشخروب) – درب جانبي
  • بسكنتا
• المتين
• فالوغا – درب جانبي
  • حمّانا – فالوغا
• عين زحلتا
• الباروك
• معاصر الشوف
• نيحا
• جزين – درب جانبي
  • بكاسين
• عيتانيت
• مجدل بلهيص
• راشيا الوادي
• حاصبيا
• مرجعيون
• عين إبل – شبكة دروب مستقلة

وإذا قرّرتوا تنطلقوا بالمغامرة، انتبهوا للعلامات المرسومة على الصخور والشجر، لأنّها الدليل الرسمي للمسار، وبتساعدكن تضلّوا على الطريق الصحيح. فيكن تكتشفوا تفاصيل كل درب بدربه بالدليل الإلكتروني هون. 

هدف درب الجبل اللبناني ما بيقتصر على الهايكينغ، بس كمان بيساهم بتشجيع السياحة البيئية، ودعم القرى والاقتصاد المحلي، والتعريف بالطبيعة والتراث اللبناني، والحفاظ على المسارات والمواقع الطبيعية.

درب الجبل اللبناني هو من أجمل التجارب يلي فيكن تعيشوها بلبنان، ورحلة بتاخدكن من أقصى الشمال لأقصى الجنوب، مرورًا بمجموعة من أروع المناطق بالبلد.

شوفوا كمان:

محمية غزلان ساحرة ناطرتكن بعمق غابات كسروان!