8 جواهر مخبّاية ببيروت لازم تزوروها

إذا عم تفتّشوا على محلات جديدة تغيّرلكن جو ببيروت، جمعنالكن 8 جواهر مخبّاية لازم تحطّوها ع الليستا.

احفظوا هالدليل لوقت تحتاروا وين تضهروا.

1. Naranj Cafe، مونو

إذا بعدكن ما زرتوا Naranj Café، عم يفوتكن واحد من أحلى الأماكن المخباية ببيروت. بتلاقوا بمونو، وعندو تراس برا مليان خضار، مثالي لغدا تحت الشمس أو فنجان قهوة ع رواق.

فيه نافورة مي مليانة ورد، شجر نارنج، وجو تراثي بيعطي المكان رواق ما بتلاقوا بأي محل تاني ببيروت.

أما المنيو، فيه كل الأكلات لبنانية وعربية يلي منحبها بس ع طريقتن، من التبولة والمازة للمشاوي والحلويات البيتية. هو من الأماكن يلي بتروحوا عليها لغدا وبتقعدوا فيها ساعات. خيار روعة إذا بدكن تضهروا من دون ما تطلعوا برا بيروت.

لمزيد من المعلومات، تأكدوا من صفحة الإنستغرام الخاصة فيهن أو اتصلوا ع الرقم 118 511 71.

2. توتي، العدلية

إذا بتحبوا القعدات بالجنينة، Tooty من أجدد الأماكن ببيروت. قاعد بالعدلية وبيجمع بين الجنينة، الزوايا المريحة، والجو البيتوتي.

سواء رايحين ع قهوة الصبح، غدا، أو مشروب بالليل، هالمكان مناسب بكل الأوقات. بيفتح من 9 الصبح للـ1 بعد نص الليل، وكمان بيعمل سهرات موسيقية ما بتتفوت.

3. Beyond Organic، مار مخايل

إذا بدكن مكان ترتاحوا فيه شوي، Beyond Organic خيار حلو. هالمكان هو كافيه، متجر منتجات عضوية، ومحل للشتل بنفس الوقت.

أغلب المكونات بتجي من مزرعتن بالدامور. فيكن تستمتعوا بترويقة، قهوة مختصة، أو تتسوّقوا كم زريعة قبل ما تفلّوا.

4. Poiema House، الأشرفية

Poiema House موجود ببيت لبناني تراثي تم ترميمه، وهو المكان المناسب إذا بدكن تعملوا شي مختلف.

فيكن تشاركوا بورش فخار، صناعة شموع، أو Sip & Paint مع أصحابكن، وتستمتعوا بجو هادي ومريح. Poiema بيقدّم تجربة رايقة، وين الإبداع والتواصل بيلتقوا سوا.

5. Cafe Amor، الأشرفية

إذا عم تفتّشوا على كافيه بترجعوا عليه كل مرة، Café Amor من الأماكن المفضلة بالأشرفية. بيفتح من الاثنين للسبت، من 7 الصبح للـ9 المسا، وبيقدّم قهوة، كعك طازة، غرانولا، وترويقة خفيفة.

الجو مريح، وكتير ناس بيحبّوا يقعدوا فيه للدرس أو الشغل أو حتى لتمضية الوقت.

6. Folk Beirut، الحمرا

فُلك بيروت، مكتبة ومساحة ثقافية جديدة، فتحت أبوابها بقلب الحمرا.

فُلك مش بس مطرح بتروحوا عليه لتشتروا كتابكن المفضّل. هي مكتبة مركّبة ومساحة ثقافية بتجمع بين الكتب، اللقاءات، والإبداع. فيها رفوف مليانة عناوين متنوعة، مساحة هادية للقراية والدراسة، متجر صغير للكتب والتذكارات، ومشغل مخصّص للورش الفنية والثقافية.

بدّكن تعرفوا أكتر عن هيدا المحل؟ اكبسوا هون.

7. TIME ETC.، الأشرفية

إذا بتحبوا السهرات الهادية، TIME ETC. من الأماكن يلي لازم تزوروها. بيعملوا حفلات بالجنينة عطول، وبيقدّموا أكلات مميزة وكوكتيلات.

وفيه قعدات داخلية وخارجية، يعني مناسب لأي سهرة مع الأصحاب.

8. Wardufil، مار مخايل

Wardufil بيجمع بين القهوة والسبا ببيت ضيافة تراثي بمار مخايل.

إذا بدكن تهربوا شوي من عجقة المدينة، فيكن تروحوا تشربوا قهوة، تحجزوا جلسة سبا، أو بس تستمتعوا بالجو. الديكور الزهري والتفاصيل التراثية بيعطوا المكان طابع مميز، وبيخلّوه من أجمل الأماكن ببيروت.

خبرونا، أي محل رح تختاروا لضهرتكن الجاية؟

شوفوا كمان:

أجمل ٩ كافيهات مع جنينة بقلب بيروت