DWTS Mania Overtakes Lebanon, Here Are the Highlights From Episode One مدونة

«رقص النجوم» رجع ع الشاشة اللبنانية، وهيدي أبرز لحظات الحلقة الأولى!

بعد غياب حوالي 9 سنين عن الشاشة اللبنانية، رجع برنامج «رقص النجوم» (Dancing with the Stars) رسميًا! وانطلق الموسم الخامس على شاشة MTV Lebanon نهار الأحد 15 تشرين الثاني، بمشاركة 13 وجه معروف من عالم التمثيل، والغناء، والرياضة، والإعلام وصناعة المحتوى.

مع لجنة تحكيم جديدة، وتغييرات بالتقديم والإنتاج، شفنا كمان وجوه مألوفة عم تجرّب حالها بمجال الرقص. ورجعة البرنامج كانت كفيلة تفتح باب الحماس والتعليقات بين المشاهدين! شو صار خلال الحلقة الأولى، ومين تصدّر النتائج؟ هيدي أبرز التفاصيل!

هالموسم، 13 شخصية معروفة قرّروا يخوضوا تجربة جديدة ويجرّبوا مهاراتن بالرقص، بمساعدة راقصين محترفين رح يرافقوهن خلال المنافسة.

وهيدي ليستا المشاركين وشركائن بالرقص:

  • الممثلة ورد الخال مع اسادور يورديجيان
  • الممثلة ستيفاني عطالله مع مايك بولاديان
  • الممثلة جينيفر عازار مع جيم قنطار
  • الممثلة ميا علاوي مع رائد مراد
  • الممثل وسام فارس مع ساندرا عباس
  • الكوميدي ماريو باسيل مع كلوي حوراني
  • ملكة جمال لبنان السابقة مايا رعيدي مع جان بيار ديب
  • لاعب كرة السلة السابق إيلي مشنتف مع أنجيلا أبو عبود
  • البطل البار المبي أرز زهر الدين مع جويا فرحة
  • صانعة المحتوى بيرت واكد مع جو شعيّا
  • صانع المحتوى ميلاد رحّال مع سيرينا كبندجيان
  • المغني والممثل والوصيف السابق لملك جمال لبنان، تامر نجم مع روى عقيقي
  • الإعلامية غاييل (غاغا) خوري مع غدي مراد

ومع هالتنوّع بالأعمار والمجالات، المنافسة أكيد رح تكون مليانة مفاجآت، خصوصًا إنو كل ثنائي رح يشتغل على تعلّم رقصات وخطوات جديدة ليقدّم أفضل ما عنده على المسرح.

هالموسم، شفنا تغيير بوجوه مقدّمي البرنامج، مع انضمام الإعلامية جيسيكا عازار والصحافي أنطوان سعادة، بدل وسام بريدي وكارلا حداد.

وكمان رح يكون صانع المحتوى سامر مومنة موجود، لينقلنا أجواء التمارين والتحضيرات من ورا الكواليس، ويشاركنا تفاصيل ما منشوفها عادةً على المسرح.

أما بلجنة التحكيم، فمن أبرز الوجوه الجديدة الممثلة دانييلا رحمة، اللي سبق وشاركت بالبرنامج وفازت فيه، ورجعت هالمرة بدور مختلف كعضو بلجنة التحكيم!

ورح تنضمّ إلها خبيرة الرقص ميرا سماحة، وخبير الرقص ربيع نحاس، والراقص المحترف ومصمّم الرقصات البريطاني دارين بينيت.

بعد ما قدّم المشاركين أول عروضن، قيّمت لجنة التحكيم أداء كل ثنائي وأعطته علاماته، وصار عنا أول ترتيب للمنافسة. وقدرت ستيفاني عطالله تخطف المركز الأول بـ33 نقطة!

وهيدي العلامات اللي حصل عليها كل مشارك:

  1. ستيفاني عطالله: 33 نقطة
  2. مايا رعيدي: 31 نقطة
  3. ميا علاوي: 31 نقطة
  4. أرز زهر الدين: 31 نقطة
  5. بيرت واكد: 29 نقطة
  6. جينيفر عازار: 28 نقطة
  7. تامر نجم: 26 نقطة
  8. ورد الخال: 26 نقطة
  9. وسام فارس: 26 نقطة
  10. غاييل (غاغا) خوري: 25 نقطة
  11. ميلاد رحّال: 24 نقطة
  12. إيلي مشنتف: 21 نقطة
  13. ماريو باسيل: 18 نقطة

بعد غياب دام 9 سنين، طبيعي يكون في حماس كبير لرجعة البرنامج، والمشاهدين كان عندن كتير تعليقات وآراء بعد ما شافوا الحلقة الأولى ورجعوا تابعوا برنامج كانوا ناطرين رجعته من زمان.

رجعة «رقص النجوم» رجّعت معها أجواء برنامج تلفزيوني محبوب، وفتحت موسم جديد من المنافسة والرقص على الشاشة اللبنانية!

مين كان المشارك المفضّل عندكن بالحلقة الأولى؟ ولمين صوّتّوا؟ وإذا بعد ما صوّتّوا، اكبسوا هون!

شوفوا قسم #الأخبار ع موقعنا للمزيد.