بوظة شغل إيد .. لأصحاب القلب القوي بس!

وقت بدو ينصح اللبناني شخص تاني بأكلة ويعبّرعنها قديش طيّبة بقلّك “بروح نصّ عمرك اذا ما دقتها” أو ” هالأكلة بتوجّع القلب”.

نفس الشي بالنسبة ل محلّ “Frooza Booza“ الواحد بدو يقوّي قلبو لأن طعمتها وشكلها غير شِكِل! المحلّ موجود ب مار مخايل وABC Verdun وAvenue 19/Rayfoun.

بوظة هيدا المحلّ بتتميّز انّها شغل إيد، انت وواقف بيعملولك ياها وعذوقك بتنقّي النّكهة اللي بتحبّها والإضافات اللي بتشتهيها. وللأشخاص اللي بحبّو الاهتمام الشخصي بالأكل اللي بيُطُلبو .. هيدا المحل طَلَبُن!

ومش ضروري تاكل البوظة بالكباية، اذا كنت من عشّاق الفواكة، ب هالمحلّ فيهن يعملولك البوظة محشيّة ومزَيَّنِي بحبّة أناناس أو حتّى قطعة بطيخ مثلا! وأكيد بطريقة كتير مهضومة ومُغرِية.

ولمحبّي الحلويّات كمان هالمحلّ بقدم أشهى كنافة وأطيب دوناتس وبسكويت محشيّة بالبوظة اللي بدّك ياها! يعني صار فيك تتحلّى بالكنافة وتبورِد بالبوظة.

البوظة ب Frooza Booza بتفرفح القلب والنّظر بألوانها وتزيينها! كيف اذا بدنا نحكي ع طعمتها؟ كلّ أنواع الشوكولا، الفواكة، حلويات الجيلاتين، والكورنفلَكس وغيرها كتير حسب الطلب.

كرمال هيك.. خلّي قلبك قوي وجرّب Frooza Booza وما بتندم، لأنّو ببساطة: أتِل!!