لقينا أجمل مطاعم برمانا بالهوا الطلق

خلينا نعرفكن على أحلى قعدات برمانا بالهوا الطلق يلي ضروري تزوروها هالصيفية! هيدي المحلات رح تناسب الأشخاص يلي بحبو القعدة تحت الشجر والنجوم والبرودات الحلوين.

١. برمانا فيلا Broumana Villa

جربوا الأكل والشرب عند برمانا فيلا المزينة بالورود ويلي بتقدم مجموعة من المطابخ والمطاعم العالمية لتعيشكن تجربة خارجة عن المألوف. القعدة برا بتفتح النفس والأجواء الصيفية بتطغي على المكان.

الرقم: 120 860 04

٢. أون ذا روكس On The Rocks

أهضم قعدة هل صيفية بتلاقوها عند On The Rocks، شمسيات ملونة فوق راسكن، شجر، طاولات وكراسي ملونين، جنينة، منظر ولا أجمل، قعدة بفيّات الشجر، مشروب وعصير، ورود وأكل كتير طيب ومنظر ما بيخطر على بال حدا. أكيد القعدة بهل مطرح من العمر رح تخليكن تستمتعوا ببرودات برمانا الحلوين والأكل الطيب والجبال الشامخة والمشروب اللذيذ.

الرقم: 055 020 70

٣. مشروع كافي

اشربوا نفس أرغيلة ولعبوا دق طاولة عند مشروع كافي لي بيتميز بديكور ساحر بين الشجر والأضوية الخافتة. قاعد بقلب أوتيل Printania على التراس وبيتميز بجلسة صيفية مع موسيقى شرقية على الخفيف وبقدم أطيب وأشهى الأطباق اللبنانية والعالمية.

الرقم: 444 090 76

٤. بوظة

هل محل منو مطعم بحد ذاتو بس بيعمل بوظة ولا أطيب من هيك، لهيك ما قدرنا ما نجيب سيرتو لأن كلنا بهيك أوقات منشتهي البوظة وكيف إذا كانت بالجبل! كلوا أطيب تحلاية عند بوظة وجربوا الطعمات والنكهات المختلفة وحتى فيكن تستفيدوا من القعدة البرا المهضومة مع الأصحاب والأحباب لتعملوا أحلى الذكريات.

الرقم: 307 309 79

٥. سينكو

أحلى وقت تزوروا سينكو هوي بالليل، بتقعدوا حد البيسين، بتاكلوا لقمة على الخفيف بتبوردوا وبتتسايروا وبتكفوا السهرية مع موسيقى ومشروب طيب. الأجواء كتير حلوة وموقع المحل رح تنغرموا في، بقلب أوتيل مميز وأحلى قعدة في بتكون المسا ووقت مغيب الشمس مع أجواء الموسيقى الفرحة.

الرقم: 300 663 70

٦. منير

من أجمل المطاعم الجبلية بلبنان، ويعتبر الملجا الأمين من شوبات المدينة، عندو قعدة برا بتطل على أحلى فيو بالمنطقة. فيكن تستمتعوا ببرودات الجنينة، تاكلوا على التراس وتتفرجوا على المناظر الحلوة وترجعوا تبوردوا بلقمة فواكة مسقعة.

الرقم: 900 873 04

٧. بو إميل

من أجمل المطاعم الموجودة ببرمانا، الكل بيقصدوا من ورا أكلو الطيب وقعدتو الحلوة. القعدة برا عندو بيطغي عليها اللون الأحمر الوردي وأكيد رح تحبوا نسمة الهوا وفيات الشجر لي رح يرافقوكن كل الوقت. بقدم أطيب الأطباق اللبنانية، بعض الأطباق العالمية وأشهى الحلويات.

الرقم: 222 264 71

شوفوا كمان، ٥٠ محل تزوروه هالصيفية بلبنان: من الشمال للجنوب!