أطيب مطاعم دير القمر مع قعدة جبلية

بقصورها التاريخية، شوارعها القديمة، بيوتها التراثية، ومناظرها الجبلية، ضيعة دير القمر مقصد سياحي مهم بالبلد، وجوهرة بالشوف بتخطف قلوب زوارها وبتحفر ذكريات ما بتنتسى. اليوم قررنا نطلع على عروس الشوف ونكتشف دير القمر حارة بحارة. ولأنو المشوار الحلو ما بيكمل من دون اللقمة الطيبة، خلونا ندلكن على أجمل وأطيب مطاعم دير القمر. 

1. بيت الجبل

عيشوا سحر سنين بقلب مطعم وبيوت ضيافة تراثية. بيت الجبل مطرح خيالي بيقدملكن لقمة دير القمر ونسمات الجبل. مطعم قاعد من فوق الوادي، بيطل على أجمل المناظر الجبلية وعندو واحد من أجمل التراسات الرومانسية بلبنان.

عندو اللقمة اللبنانية الأصيلة، والبيتزا البيتوتية على الحطب، البوفيهات الطيبة، والقعدة الشرحة بحضن الطبيعة. مكان بحسسّكن بالراحة النفسية وبيستقبلكن على أروع ليالي رومانسية بالجبل. 

الرقم: 767 160 71 

2. بيت القمر 

بهل بيت التراثي بتلاقوا مخبى أشهى الأكلات اللبنانية! مكان بتفوح منو ريحة طبخ التيتا والبوفيهات اللي بتشق القلب. 

مطعم بيتميز بالديكور التراثي وبتلاقوا كل التفاصيل بتاخدكن على بيت جدو بالجبل، مطرح مميز لتجربوا لقمة طيبة وقعدة الجنينة مع العيلة والولاد.

الرقم: 397 981 70

3. مطعم دير الأمراء

مين عبالوا غدا بقلب قصر تراثي وواحد من أروع مطاعم دير القمر؟ 

هالقصر كان بزمناتو للأمرا وبعدين صار أوتيل تاريخي بيستقبل الناس على اللقمة اللبنانية، القعدة الجبلية على أصولها، وترويقة بلدية تحت القناطر وعلى التراسات الساحرة. 

الرقم: 557 511 05

شوفوا كمان، مشوار أيلول، شو فيكن تعملوا بضيعة عنجر؟