٥ مطاعم خريفية مع قعدة مكنكنة

بهالطقس يلي عم يتقلب بسرعة، كلنا صار عبالنا نقعد قعدة خريفية مكنكنة وحلوة، مشوا معنا كزدورة على ه مطاعم خريفية.

١. مطعم فليننت Flint، ضهر الصوان

بمنطقة ضهر الصوان الجبلية قاعد مطعم “فلينت” . بالخريف الجو عندن كتير حلو، المحل كلو مضوي بالشموع وبقدم أكل عالمي بقلب فيلا أنتيكا من حجر ومزينة بديكور عتيق وأثري. عندن كمان قعدة برا فيكن تستمتعوا فيها بالهوايات الروعة تحت ضو النجوم. على الأكيد جلستكن رح تكون رومانسية!

الرقم: 375 864 71

٢. لولا، بكفيا

بقلب ضيعة بكفيا الجبلية، رح تلاقوا مطعم إسمو لولا، هل مكان مثالي لتاخدوا حبيبكن وتاكلوا وصفات رهيبة وتستمتعوا بإطلالة أروع بعد. ولما تبردوا شوي، رح تحبوا الدفا لما تقعدوا جوا وتشربوا كاس نبيد أحمر بدفي القلب.

الرقم: 706 062 71

٣. ماريولينو Mariolino، البترون

واحد من أطيب مطاعم البيتزا الإيطالية بالبترون وبلبنان، بيخبزلكن لقمة طليانية بيتوتية بتخليكن تحسوا بجو الخريف على المزبوط. قعدة لذيذة ومكنكنة، تخايلوا حالكن عم تاكلوا بيتزا رقيقة تحت الشجرات لي تلونت أصفر.

الرقم: 555 766 76

٤. لا ميناجري La Ménagerie

هيدا المحل عبارة عن مطعم ومحل ورود بنفس الوقت، بتكمشوا إيد حبيبكن وبتقعدوا بقلب هل محل المكنكن وبتتمتعوا بالأكل الطيب وبتشتروا أحلى وردة لأكتر حدا بتحبوا.

الفرع الأول: كليمانصو
الرقم: 671 888 81

الفرع التاني: الأشرفية
الرقم: 206 201 01

٥. شي ميشيل Chez Michel، فقرا

مطعم قريب على السما والنجوم، بياخدكن رحلة ممتعة على أجمل فيو بفقرا. جربوا الأكل اللبناني الأصيل مع برودات تشرين الحلوين وعيشوا تجربة بطير العقل بين شجر السنديان والزنزلخت. كل الأكل عندو بلدي أصيل، حتى العرقات من الكركة دغري وراس البندورة جبلي!

الرقم: 991 811 78

شوفوا كمان، ٥ محلات لتشربوا قهوة مع فيو.