لقينا ٥ مطاعم بالباروك مع قعدة بتطير العقل

أول ما توصلوا على الباروك وتستمتعوا بجمال الجبل والأرزات الحلوين مع نسمات الهوا العليل، رح تعرفوا إنكن وصلتوا على قطعة من الجنة. كلمة الباروك أصلها فينيقي وبتعني “الأرض المباركة” وهيي فعلاً الله نعم عليها بالطبيعة الحلوة، ينابيع المي واللوحات الفنية الطبيعية. لهيك اليوم رح نعرفكن على ٥ مطاعم بالباروك مع قعدة بتطير العقل.

١. مطعم السائح Tourist Restaurant

عبالكن تكزدروا صوب الجبل وتشوفوا المحمية؟ ما إلكن إلا هل مطعم البيتوتي لي عندو قعدة حلوة وبسيطة جنب الطبيعة ورواقان لأبعد الحدود. غمسوا صحنكن بمختلف أطباق المازة اللبنانية وأطيب المعجنات وغيرها من المأكولات لي منشتهيها خاصةً وقت الضهرات مع العيلة وأكيد مع كاس عرق وفنجان قهوة بعد الغدا- ما تعتلوا هم الولاد لأن رح يلاقوا الأكلات لي بحبوها موجودة.

الرقم: 587 240 05

٢. المملكة

لكل محبي الرواق هل محل بسيط وعجق بنفس الوقت، بيدعيكن للراحة من جهة، وللأكل اللبناني الأصيل من جهة تانية. استرخوا بأحضان الباروك، شوفوا المي وتلذذوا بكل لقمة بالجبل من الأكل الطيب للحلو والفواكة وأكيد ما في أجمل من قعدة فنجان القهوة بعد الأكل اللبناني- عندن كمان صالة شتوية دافية من حجر فيها بتحلا الجلسة مع الأحباب وسط الأضوية الخافتة.

الرقم: 143 865 03

٣. أوتيل ومطعم شلالات الباروك

محل محاط بالشجر والطبيعة المميزة، كتير مناسب لغدا نهار الأحد، للمشاوي ولتتمشوا بين أحضان الطبيعة. اتمتعوا بأطيب مازة لبنانية على الأصول بتجي على طاولتكن وبتخليكن تشبعوا من الأكل الطيب والمنظر الحلو. فيكن كمان تقرروا تناموا بهل أوتيل المميز وتستفيدوا من كل الخدمات المتوفرة والجو الروقان وفيكن كمان تقعدوا بالصالة الشتوية بس يبرد الطقس، رح تحبوا كتير برودة الطقس اللطيفة هونيك.

الرقم: 922 901 81

٤. المضياف

هل مطعم قاعد حد شلالات الباروك وبقدم أشهى وأطيب الأطباق اللبنانية الأصلية وسفرة بيتية مميزة من أطيب الصحون التقليدية والمشاوي المشكلة. فيكن تجربوا أطيب الأطباق هني والولاد عم يلعبوا، عندن قعدة مميزة لجو العيلة والجمعات الكبيرة.

الرقم: 318 443 70

٥. بيتنا

هل محل موجود بنص الضيعة، بتلاقوا بقلبوا عين مي مسقعة فيكن تشربوا منا مي لتشبعوا، بتقعدوا على الشير وبتتفرجوا على الوادي وبتوصل المازة على طاولتكن مع أغاني فيروز ووديع الصافي وبالشتوية بتقعدوا بقلب بيت حجر عتيق وبتدفوا حد النار وبتاكلوا أطيب لقمة مع الناس لي بتحبوهن. في أحلى من هيك قعدة؟

الرقم: 456 841 03

شوفوا كمان، لقينا ٤ مطاعم اللقلوق مع قعدة بتطير العقل.