حزروا شو؟ عمرو دياب راجع على بيروت بأضخم حفل هالصيفية!

حزروا شو؟ خبرية بتطوش لكل حدا بيعشق الموسيقى وبيعشق عمرو دياب! عمرو دياب راجع للسنة التالية على التوالي على بيروت بأضخم حفل بالصيفية بعيد الأضحى الشهر الجاية.

ليالي بيروت السنة رح تكون استثنائية مع أجمل المهرجانات والحفلات الموسيقية من وائل كفوري لأصالة وهلق عمرو دياب. رغم كل شي بيروت رح تضل مبسوطة ورح تضل عايشة!

الحفل الأضخم ببيروت هالصيفية رح يحيي الفنان المصري الأشهر الهضبة عمرو دياب.

نهار 15 حزيران المقبل على مسرح “Waterfront Arena” بيروت رح يكون ناطركن النجم الكبير عمرو دياب ليحيى ليلة ما بتنتسى مليانة فرح ورقص وموسيقى ويقدم أجمل أغاني من الكلاسيكيات “نور العين”، “قصاد عيني” و”ليل نهاري” لأجدد أغاني الراقصة من “الحفلة”، “يا أنا يا لاء”، و”يا قمر”.

الإعلان المميز إجا بسبب الحفلة الناجحة يلي أحياها النجم المصري الكبير ببيروت الصيف الماضي وسط حشد شعبي ضخم، بعد غيابو 12 سنة عن إحياء الحفلات بلبنان. وهالحفلة وقتها حكي فيها كل البلد بسبب نجاحها الكبير والأعداد الهائلة لي حضرت والجو يلي كانت الناس مشتاقة لإلو كتير.

كلنا منتذكر إنو السنة الماضية طلب عمرو دياب من جمهورو والحاضرين بالحفل إنو يلبسو أبيض، فأولكن هالسنة شو رح يكون ال dress code؟

إضافة إلى تفاصيل الحفل الروعة، رح يكون في حفلة افتتاحية استثنائية وفقرات موسيقية خاصة من تنظيم DJ Rodge المتعدد المواهب. بيشتهر Rodge بنغماتو الديناميكية والإيقاعات المليانة حياة وفرح وحب الصيف، وعلى الأكيد رح يولع المسرح بانتظار الأيقونة عمرو دياب.

تم تحقيق هالحدث المميز بفضل جهود شركة Mix Productions.

للمزيد من المعلومات وتفاصيل عن بيع وأسعار التذاكر يلي رح يطلعوا نهار الثلثاء، تابعوا Venturelifestyle على مواقع وسائل التواصل الاجتماعي وترقبوا صدورن قريباً.

شوفوا كمان، هيك كانت أسعار دخولية المسابح لسنة 2023 وهيك صارت بسنة 2024.