٧ مطاعم جبلية وسط الطبيعة بلبنان

ليه في أجمل من سفرة مفروشة ألوان وطعمات وقدامكن غابة بتفتح القلب؟ خلينا ناخدكن بجولة على٧ مطاعم جبلية وسط الطبيعة بلبنان بخلوكن تنسوا هموم الدني كلها. هوا جبلي مع كاسة عرق وريحة المشاوي ومنظر شجر الصنوبر وصوت العصافير، تحمستوا متلنا؟

١. La Maison de la Forêt، بكاسين

عندن بيوت بقلب الغابة بتستقبلكن على أحلى قعدة بنص صنوبر بكاسين. شو عبالكن غدا وسط الطبيعة؟ تمتعوا بتجربة مميزة بأحضان الغابة عند هالمطعم! بيقدم مأكولات لبنانية تقليدية مع لمسة عصرية، بتقدروا تقعدوا بقلب الطبيعة وترخوها كل النهار مع نسمات الهوا الحلوة.

الرقم: 222 800 07

٢. مطعم بيوماس، جربتا

قعدة إستثنائية وسط أجواء عائلية، بقدم مأكولات لبنانية وطبخات بيتوتية وأطباق المازة اللبنانية والسندويشات مع فواكة وخضرا وحلويات. قضوا وقت حلو بالطبيعة وعيشوا لحظات ساحرة بقلب الغابة.

الرقم: 532 532 03

٣. جنينة بيت بشارة، فيطرون

بس توصلوا على الجنينة رح تحسوا بالسحر الموجود والجمال يلي بتعجز الكلمات عن وصفو: شجر، قعدة بالغابة، طاولات وكراسي خشب، مزرعة، أكلات بيتوتية، هوا جبلي، مشروب وعصير، ورود وأكل كتير طيب.

الرقم: 093 376 03

٤. جنة الأرز، الأرز

جنة الأرز إسم على مسمى لأن عنجد بيشبه الجنة على الأرض! تخايلوا إنكن قاعدين بقلب الغابة، بقعدة جبلية، وعم تشموا ريحة شجر الأرز وتتفرجوا على أروع المناظر الطبيعية دغري تحتكن وعم تاكلوا أطيب لقمة لبنانية.

الرقم: 760 743 03

٥. مطعم لوس، جزين

من أجمل المطاعم بجزين لتجربوا لقمة طيبة وقعدة مميزة بحضن الطبيعة وإنتو ومحاوطين بغابة الصنوبر بجزين. رح تدوقوا المازة اللبنانية على أصولها وتسافروا بأفكاركن لبعيد وتسمعوا صوت الشجر.

الرقم: 330 780 07

٦. ديوان الوادي، القبيات

من أجمل المطاعم يلي ممكن تزوروها من ورا موقعو بقلب طبيعة وادي حلسبان اللي معروف قدي طبيعتو بتسحر! بتاكلوا لقمة طيبة على صوت العصافير وريحة الطبيعة.

الرقم: 519 488 03

٧. جبلنا، الزعرور

مطعم ومزرعة بنص الطبيعة لكل مين عبالوا يعيش مغامرة حلوة! الأكل صحي وبيتوتي من المزرعة على طاولتكن دغري وبخليكن تنتعشوا بكل لقمة من ورا القعدة واللقمة الطيبة.

الرقم: 616 776 71

شوفوا كمان، جوهرة مخباية: تعرفوا على هالبيت.