٦ أماكن رائعة الجمال ببيروت!

عم تبرموا على مطرح غير إعتيادي؟ الديكور الساحر والجو الحلو؟ عملنا برمة بين الشوارع البيروتية، وجبنالكن ٦ جواهر مخفية رح تدهشكن حول بيروت. ما تنسوا تزوروها وتاخدوا أجمل الصور!

1. Café D’Orient، الأشرفية

بديكور ساحر بيجمع بين ثقافة بيروت والأجواد الشرقية، Café D’Orient بيوعدكن بطعم أصيل من البلد. والحلو انو عندو قعدة بتنسيكن إنكن ببيروت أد ما فيها خضار.

2. La Burrateria، الأشرفية

رح نعرّفكن على أكتر زاوية ملوّنة ومليانة حياة بالأشرفية، لوحة مأخودة من شوارع روما! هالمطعم فيه الأطباق الإيطالية اللي مقدّمة بكل فنية وشغف. لازم تزوروا لتاكلوا أكل طيب، تعيشوا الجو الحلو، وتاخدوا صور روعة!

3. جاكاراندا، مار مخايل

بيت زهري عندو قعدة تحت شجر الجاكرندا البنفسجي بقلب مار مخايل! فإذا كنتوا قاعدين ببيروت، وعم تدوروا على ملاذ أخضر بدون ما تتركوا المدينة، رح تحبوا هيدا المكان.

4. Ales & Tales، الحمرا

واحد من أجمل المطارح بالحمرا و فعلاً فيه من أحلى القعدات ببيروت. تراس صغير طالع من لوحة فنية، مع رسومات ع الحيط بتخطف الأنظار.

5. مريول، صيفي

هالمطعم اللبناني المحبوب بلّش بمار مخايل بالـ2017 بفكرة رائعة، وهلق فتح بصيفي بعد فترة من التسكير. أحلى شي بهالمطرح هو “بحبك يا حمار” اللي مرسوم عالحيط.

مع الديكور البسيط، مريول صار واحد من أكتر الأماكن الجذابة بالمدينة.

6. Maison Prunelle، وسط بيروت

هيدا الكافيه العصري والجديد بوسط بيروت عندو تشكيلة إستثنائية من المخبوزات الطازة والكرواسون اللي بيجنن. الجمال بتلاقوا بالتفاصيل عند ميسون برونيل، مع الورود والأجواء الفرنسية اللي بترافق كل طبق.

خبرونا، زي جوهرة من هل جواهر مخفية المفضلة عندكن بقلب بيروت؟

عبالكن تشوفوا باقي الجواهر المخفية بلبنان؟ شوفوا قسمنا على الموقع هون.