قبة دورس تحت القصف: آثار تاريخية في خطر

المدخل الجنوبي لبعلبك اتضرر كتير بسبب القصف العدواني. من الصبح بكير، كانت جرافات بلدية بعلبك ودورس مع مجموعة من الأهالي عم يشتغلوا ع فتح الطريق. فرق الدفاع المدني كانت سهرانة كل الليل، عم تطفي الحرايق وتبرد المنطقة حتى يقدروا يرجعوا يفتحوا الطريق ويمرقوا السيارات.

بحسب “الوكالة الوطنية للإعلام“، قبة دورس اللي بترجع لعهد الدولة الأيوبية تضررت كتير بالقصف. هالقبة مبنية على ٨ عواميد من الغرانيت الأحمر، وبيقولوا إنو حجارتها مأخوذة من آثار قلعة بعلبك القديمة. كانت القبة موجودة ع مدخل بعلبك الجنوبي، بمنطقة دورس اللي كانت زمان مقبرة رومانية كبيرة. بس مع القصف، جزء من القبة انهار. كمان، مستشفى “المرتضى” اللي قريب من المنطقة تضرر من الانفجار.

رئيس بلدية بعلبك علق على الموضوع وقال إنو الضربات عملت دمار كبير. ضربت المباني والمحلات التجارية وحتى قبة دورس اللي هي جزء من مواقع التراث العالمي لليونسكو.

ومن جهة تانية، نفى المحافظ بشير خضر الشائعات اللي بتقول إنه صار ميلان أو انهيار بأعمدة قلعة بعلبك الشهيرة.

بظل هالأوضاع الصعبة، الدولة لازم تتحرك لحماية التراث الثقافي والتاريخي بلبنان، لأن معالمنا وآثارنا إلها قيمة كبيرة ولازم نحافظ عليها رغم كل شي عم يصير.

شوفوا كمان، Clown Me In: عم يزرعوا الضحكة ع وجوه الأطفال النازحين