بيت ضيافة ع شكل طاحونة الهوا…مطرح بحسّسكن إنكن بهولندا!

تخيّلوا حالكن قاعدين بقلب بيت ضيافة ع شكل طاحونة هوا، فوق تلة بتطلّ عالبحر، والنسمة عم تمرق بين شجر الزيتون… قعدة بتحسّسكن إنكن بنصّ مشهد بيجمع بين هولندا ولبنان. 

هيك كل لحظة من نهاركن رح تكون عند The Windmills بالبربارة، منطقة ساحرة بس 10 دقايق عن البترون. هالمحل مش متل أي بيت ضيافة بلبنان، تجربة متوسّطية فريدة بتجمع بين الرواق، البحر، والرومانسية.

البيت نفسو تحفة معمارية! من برا بتحسّوا حالكن عنجد رحتو ع هولندا، مع شكل الطاحونة والعشب الأخضر قدّامكن، وجوّ بيناديكن لترتاحوا.

ومن أول ما تفوتوا لجوا، رح تنغرموا بالتفاصيل: ديكور مودرن، ألوان ناعمة، وضوّ دافي بيكمّل الإحساس بالرواق. كل شي مجهّز لراحتكن: أوضة نوم بأناقة فريدة وبانيو مطل عالمنظر، ومطبخ صغير فيه كل شي بتحتاجوه.

مش بس هيك: إذا الطقس حلو فيكن تستمتعوا بمسبح خاص، جنينة خضرا، ومنظر بحر بيسحركن ، هيك مناظر بتخلي الوقت يوقف.

المكان مثالي للكوبلات يلي بدّن يهربوا من العجقة، أو مجموعة رفقة بدن يقضوا ويك-اند مع بعض. ومع غروب الشمس، المشهد بيصير لوحة: منظر البحر والسما الملونة ولا أروع، مع كاس نبيذ ع ضوّ الشموع حدّ المسبح.  

هدوء، فخامة، ونجوم فوقكن… The Windmills هو المهرب الرومانسي يلي ما كنت بتعرفوا إنكن بحاجة إلو. فيكن تحجزوا عبر الرابط هون. وما تنسوا تابعوهن ع انستغرام هون.

لمحبي الطبيعة، 10 غابات بلبنان تكتشوفن بالخريف