الفالنتاين مش بس للعشاق! 6 شغلات تعملوها مع رفقاتكن البنات ببيروت!
هلق صرنا بوقت كتير دارج الوحدة تكون سينغل! ولأنو عيد الحب مش للعشاق، بس كمان للرفقة، هون شغلات تعملوها مع رفقاتكن البنات ببيروت ع Galentine’s (أو عيد الحب للأصحاب).
1. تعرّفي على ناس جديدة بسهرة مهضومة عند توتا بمار مخايل
يا إمّا تتعرّفي على ناس جداد، يا إمّا بتقضيها مع عالم بيكرهوا الفالنتاين قدّك. الحدث نهار السبت 7 شباط، الساعة 9 المسا.
2. فشّي خلقك من الحب وهمومه ب Brazza Villa 961 بجسر الواطي
سهرة خص نص للناس يلي بتحب الحب بس تعبانة منو… مع موسيقى، مشروبات، وبيتزا كتير. نهار السبت 14 شباط، الساعة 8 المسا.
3. احجزي ورشة تزيين الكيك مع رفقاتك عند Kanvartfuly بالأشرفية
من أحلى الأشيا بغالنتاين إنّك تاكلي كيك مع رفقاتك. ليه ما تسجّلوا بهالورشة وتقعدوا تزيّنوا، تحكوا، وتفضفضوا براحتكن. نهار السبت 14 شباط، الساعة 6 المسا.
4. اهربي من كل أغاني الحب بحفلة “I Hate Valentine’s Day” بـ Agora Beirut بالأشرفية
سهرة مشروبات بلا ولا ثنائي دبق قدّامِك. وإيه، ما رح يشغّلوا ولا أغنية حب. نهار الجمعة 13 شباط، الساعة 9 المسا.
5. كبري شلّة البنات مع “Galentine’s Gathering” من HIA بـKlei Beirut بمار مخايل
HIA Club عم ينظّموا ورشة رسم وتلوين إنتِ والبنات لتحكوا، تتعرّفوا على رفقات جداد، تلوّنوا على سيراميك، وبعدين تدوقوا بوفيه السناك. نهار السبت 7 شباط، الساعة 1 الضهر.
6. خططوا شهر غالنتاين كامل مع The Lydd بالجعيتاوي
The Lydd نزّلوا برنامج كامل لشهر الغالنتاين، فيكِ تختاري منّو متل ما بدِك… أو تروحي عليهن كلن. فيكِ تشوفي البرنامج تحت!
خبرونا، أي محل رح تروحوا عليه مع رفقاتكن البنات ع Galentine’s؟
