هالربيع…7 كافيهات بقلب محل ورد ببيروت
عبالكن وردة وفنجان قهوة؟ بما إنو الربيع أحلى مع القعدة الحلوة، جمعنالكن 7 كافيهات جوا محل ورد ببيروت (وقريب منها)، ليعيّشوكن أجواء كلها جمال، ريحة زهور، وراحة نفسية.
1. Galilée – ستاركو، وسط بيروت
من أجمل وأرقى الكافيهات ببيروت! ديكور فني مميز كلو شغل إيد، وقعدة بين الورود بترد الروح. بيقدموا قهوة مختصة، منيو موسمية، وأجواء كتير رايقة. غير هيك، دايمًا عندن ورشات بوكيهات، نادي للكتب، ونشاطات حلوة بتجمعكن مع ناس بتحب الفن والجمال.
الرقم: 073 444 76
2. Bouquet Délicieux – بدارو
ورا هالمحل سيدة لطيفة بتحضّر بإيدها أجمل البوكيهات. إذا مريتوا ع بدارو، اطلبوا قهوتكن مع وردة وقطعة كيك، واستمتعوا بلحظات بتنسيكن إنكن ببيروت. محل دافي، رايق، وبتحسوا الوقت بيوقف فيه!
الرقم: 291 201 03
3. Zii Flower Bar – الجميزة
جوهرة مخباية بشارع غورو. من أول ما تفوتوا، رح يلفتكن الديكور التراثي الساحر، الإضاءة الدافية، وزوايا الورد المعبيّة المكان. قهوتن طيبة، وكيكة العسل مع الورد بتعمل جو رومانسي كتير مميز.
الرقم: 033 844 78
4. Joy of Beirut – قريطم ورملة البيضا
محل كله حياة وألوان بقلب بيروت. بتاخدوا قهوتكن، شوية ورد، ويمكن دبدوب صغير كمان، وبتعيشوا أجواء ربيعية بتغير المود دغري.
الرقم: 589 996 03
5. Maison Des Roses – راس النبع
إذا بتحبوا الأجواء الحالمة، هيدا المكان لإلكن. عالم وردي بكل تفاصيله، من المشروبات المعطرة بالورد للحلويات الملونة، مع ديكور كلاسيكي أنيق وقعدات بتشبه القصص. وما في أحلى من وردة بتاخدوها معكن قبل ما تفلوا.
الرقم: 733 809 03
6. Bouquet Café – سن الفيل
مشتل عريق تحوّل لكافيه مميز وسط المدينة. قعدة واسعة، خضرا، ومريحة بين النباتات والورود. مثالي إذا بدكن تشتغلوا، ترتاحوا، أو بس تستمتعوا بفنجان قهوة على رواق. ما تنسوا تزوروا المشتل عندن وتختاروا زريعة بتحبوها لبيتكن!
الرقم: 227 147 79
7. Beit Wroud – الحمرا
محل ورد لطيف جمع بين البوكيهات الحلوة وكافيه دافي بقلب الحمرا. غير القهوة، عندن بوكسات وهدايا بتفرّح القلب، مثالية لأي مناسبة أو شخص بتحبوه.
الرقم: 565 974 76
بيروت بعدها بتخبّي زوايا حلوة بتجمع بين القهوة، الورد، واللحظات الصغيرة يلي منحبها. خبرونا، حبيتوا دليل كافيهات بقلب محل ورد ببيروت؟
