10 أيام، احتفالات مميزة وجوّ ضيعة… مهرجان شننعير راجع!

إذا بتحبّوا الضيعة، الطبيعة، والفعاليات الحلوة، حضّروا حالكن لمشوار مختلف بشننعير. من 22 آب لغاية 6 أيلول، راجع مهرجان شننعير 2026 بدورته التانية، وبهالسنة محضّر برنامج غنيّ ومتنوع على مدى 10 أيام، بيجمع بين المغامرة، الرياضة، الطبيعة، الموسيقى، الإيمان، التراث، والضيعة.

المهرجان انخلق ليحتفل بروح شننعير ويجمع أهل البلدة وزوّارها ضمن تجارب مميزة. تحت عنوان «مشوار»، المهرجان بياخدكن كل يوم ع تجربة جديدة. من مسارات المشي واكتشاف طبيعة شننعير، للسباقات والأنشطة مع الولاد، والأمسيات الموسيقية والكوميدية، وصولًا للاحتفال بعيد مار ميخايل وختام المهرجان بنهار قروي مليان أكل وموسيقى وزجل وتقاليد.

يعني إذا عم تدوّروا ع سبب تعملوا مشوار ع شننعير، هيدا البرنامج لحالو بيكفّي!

اليوم الأول – 22 آب | HIGHLANDER مع شننعير

المشوار بيبلّش بمغامرة رياضية مع HIGHLANDER Chnaniir Edition، وهي hike بنهار واحد على مسار حوالي 17 كلم بقلب شننعير. الرحلة بتجمع بين المشي، الطبيعة واكتشاف المناظر والمعالم التاريخية بالبلدة، وبتناسب يلي جايي لحالو، مع رفقاته أو مع عيلته.

📅 السبت 22 آب
📞 544 440 03

اليوم الثاني – 29 آب | مزرعة وفعاليات للولاد

نهار مخصص للصغار والعيلة مع Little Explorers بسيدة الطريق. فيكن تعيشوا تجربة مختلفة بالمزرعة، تتعرّفوا على الحيوانات، تشاركوا بالورشات والأنشطة، وتخلّوا الولاد يستمتعوا بمدينة الألعاب، قبل ما تاخدوا بريك أكل وتكملوا النهار بأجواء عائلية حلوة، وصولًا لحفل ختامي مليان ضحك ومرح.

📅 السبت 29 آب
📍 سيدة الطريق – شننعير

اليوم الثالث – 30 آب | سباق وقداس

هالمرة المشوار رياضي وروحي بنفس الوقت. النهار بيبلّش مع Chnaniir Festival Fun Run، سباق الـ5 كلم المفتوح للكل، مع ضرورة التسجيل مسبقًا. وبالمسا، بتنتقل الأجواء لكنيسة مار ميخايل للمشاركة بسجود الغروب، من بعدو القداس الإلهي وشهادة إيمانية.

📅 الأحد 30 آب
📍 شاتو رويس و كنيسة مار ميخايل – شننعير

اليوم الرابع – 31 آب | مشي بين الطبيعة ورحلة بين النجوم

بهالنهار، المشوار بياخدكن من دروب الطبيعة لعالم الفلك. الأمسية بتنطلق مع مشي عند غروب الشمس داخل محمية شننعير الطبيعية، على مسافة حوالي 1.7 كلم، قبل ما تنتقل التجربة للسما مع رحلة فلكية لرصد القمر ومشاهدة كوكب زحل عبر 3 تلسكوبات آلية.

📅 الإثنين 31 آب
📍 محمية شننعير الطبيعية

اليوم الخامس – 1 أيلول | أمسية «مشوار مع أغانينا»

بعد الطبيعة، بيجي دور الموسيقى. «مشوار مع أغانينا» أمسية بتكرّم روائع الأغنية اللبنانية وبتاخد الجمهور برحلة بين ذكريات لبنان وأجمل الأغاني اللي رافقت أجيال. الأمسية بقيادة المايسترو إيلي العليا، وبكلمات الشاعر نزار فرنسيس، لتكون ليلة مليانة نوستالجيا وموسيقى لبنانية.

📅 الثلاثاء 1 أيلول

📍 شاتو رويس – شننعير
🎟️ التذاكر عبر Ticketing Box Office

اليوم السادس – 2 أيلول | النجم هادي ضو والفنانة أندريا بو نعمة

الموسيقى بتكمل بليلة ثانية بشاتو رويس، مع الفنانة أندريا بو نعمة كحفل افتتاحي، ومن بعدها بيطلّ النجم هادي ضو بحفله. ومن الساعة 5 المسا، فيكن توصلوا بكير وتستمتعوا بالـFood Court وتكتشفوا المعرض الحرفي، يلي بيجمع مجموعة من إبداعات الحرفيين المحليين.

📅 الأربعاء 2 أيلول
📍 شاتو رويس – شننعير

🎟️ التذاكر من Ticketing Box Office

معرض الحرفيين – 1 و2 أيلول

وبالتوازي مع الأمسيات الموسيقية، شننعير رح تكون مساحة لدعم المواهب والحرفيين المحليين من خلال معرض بيجمع مجموعة مختارة من الأشغال اليدوية والإبداعات اللبنانية.

📅 1 و2 أيلول
🕔 ابتداءً من 5:00 المسا
📍 شاتو رويس

اليوم السابع – 3 أيلول | لبنان لحن الرجاء

بهالأمسية، بتلتقي الموسيقى بالإيمان بعرض بعنوان «لبنان لحن الرجاء»، بمشاركة جوقة وأوركسترا جامعة سيدة اللويزة بقيادة الأب خليل رحمة، وبمشاركة رفقا فارس.

📅 الخميس 3 أيلول
🕣 8:30 المسا
📍 مزار القديسة رفقا – شننعير

اليوم الثامن – 4 أيلول | ليلة من الكوميديا والرقص

من الضحك للرقص، هالليلة رح تكون منوّعة ومليانة أجواء. البداية مع عرض Stand-Up Comedy يقدّمه Chux وكمال فوعاني، وبعدها بتكمل السهرة مع DJ Marc وحفلة رقص.

📅 الجمعة 4 أيلول
📍 ساحة كنيسة مار ميخايل – شننعير

اليوم التاسع – 5 أيلول | ليلة عيد مار ميخايل

مع اقتراب الختام، بتاخد الاحتفالات طابع تراثي وروحي مع ليلة عيد مار ميخايل. البرنامج بيجمع بين الإيمان والتقاليد والفرح، مع قداسين احتفاليين، وساحة مخصصة للأكل، وأمسية فنية مع الفرسان الأربعة.

📅 السبت 5 أيلول
📍 كنيسة مار ميخايل – شننعير

اليوم العاشر – 6 أيلول | «عالبلدي»

ولأنّ أحلى ختام بيكون ع الطريقة اللبنانية، بيختتم المهرجان بنهار «عالبلدي»، يلي بيجمع القداس، الغدا القروي، الموسيقى، الزجل والطاولة، ومن بعدها بقداس مسائي.

📅 الأحد 6 أيلول

🕔 ابتداءً من 11 الصبح

وبهيك بيكون خلص «مشوار» مهرجان شننعير 2026، بعد 10 أيام مليانين نشاطات وتجارب ولقاءات وفعاليات للكل. مهرجان مش بس بيعبّي الصيف فرح وسعادة، إنما كمان ياخدكن بجولة حقيقية بروح ضيعة شننعير، بطبيعتها، تراثها، موسيقتها وتقاليدها، ويخلّي كل لحظة من هالمشوار ذكرى حلوة.

شوفوا كمان:

من سوبرماركت لمطاعم متنوعة…كل شي ناطركن بـ Al Forno فردان!