هالسوق عامل مسابقة زيت زيتون وفيكن تشاركوا ببلاش!

إذا بتنتجوا زيت زيتون بلبنان، هيدي فرصتكن لتشاركوا بمسابقة جديدة من سوق الطيّب! بالتعاون مع مازن عسّاف، عم ينظّم السوق «زيت لبنان» أول مسابقة لبنانية لزيت الزيتون. وعم يدعي المنتجين من كل المناطق اللبنانية يشاركوا و يعرّفوا الناس على جودة الزيت عندن.

رح تضمّ لجنة التحكيم خبراء دوليين معتمدين بتذوّق زيت الزيتون. ورح تقيّم العيّنات بحسب المعايير المعتمدة بمسابقة ماريو سولينا (Mario Solinas)، وهي من المسابقات المتخصّصة بتقييم جودة زيت الزيتون. و التقييم رح يصير من خلال تذوّق أعمى، يعني أعضاء اللجنة ما رح يعرفوا اسم المنتج أو العلامة التجارية اللي بترجع لكل عيّنة.

وبحسب النتيجة، رح يحصل كل زيت على تصنيف برونزي أو فضّي أو ذهبي. وهدف المسابقة هو تكريم منتجي زيت الزيتون بلبنان، و التعريف بجودة إنتاجن، و المساهمة بتعزيز مكانة زيت الزيتون اللبناني عالمياً.

كيف فيكن تشاركوا ب مسابقة زيت الزيتون؟

1. عبّوا استمارة التسجيل: التسجيل مجاني، ومتاح من 18 تشرين الأول لغاية 18 تشرين الثاني 2026. انتبهوا إنو الاستمارة غير المكتملة ما رح تنقبل. فيكن تسجّلوا من خلال هالرابط: استمارة التسجيل.
2. حضّروا عيّنات الزيت: لازم تقدّموا عبوتين من نفس زيت الزيتون اللي سجّلتوه بالاستمارة، سعة كل وحدة 500 مل.
3. جهّزوا التحليل المخبري: لازم ترفقوا تحليل مخبري بيأكّد إنو نسبة الحموضة بالزيت ما بتتخطّى 0.8٪.
4. سلّموا العيّنات: فيكن تسلّموا العبوتين مع التحليل المخبري بسوق الطيّب، من الجمعة 20 تشرين الثاني للأربعاء 25 تشرين الثاني 2026، بين الساعة 9 الصبح والـ4 بعد الضهر. عند التسليم، اسألوا عن إيلي.
5. تابعوا إعلان النتائج: رح تنعمل المسابقة وتنعرض النتائج نهار السبت 28 تشرين الثاني 2026 بسوق الطيّب.

شو هو سوق الطيّب؟

من وقت تأسيسه سنة 2004، بيشتغل سوق الطيّب على دعم مزارعين وصغار منتجين من مختلف المناطق اللبنانية، وبيعطيهن فرصة يعرّفوا الناس على منتجاتن المحلية ويبيعوها مباشرة. كمان بيساهم بالحفاظ على تراث الأكل اللبناني والمونة البلدية.

واليوم، صار سوق الطيّب بمحلّه الجديد بجسر الواطي – التحويطة، وبيضمّ كافيه ودكانة وجنينة ومنتزه للكلاب، بالإضافة لفعاليات مختلفة بتجمع الناس حول الأكل والمنتجات المحلية.

شوفوا كمان:

TéléCafé فتح بمحطة تلفريك جونية… شو ناطركن برحلتكن؟