شو مشاريعنا
بيروت.كوم

هيك فيكن تقضوا أحلى مغامرة بأحضان تنورين

اليوم مشوارنا بياخدنا على الشمال وتحديداً على ضيعة تنورين، هالضيعة اللي بتتميز بطبيعتها الإستثنائية وبتجذب السياح من كل العالم، زيارة وحدة كفيلة تخليكن تحبوها لهل الضيعة لأنو دغري بتفوت على القلب من ناسها لبيوتها الحلوة وطبيعتها المميزة وغاباتها الساحرة والمعمرة. خلونا نشوف شو فينا نعمل بهالضيعة المهضومة.

1. إكتشفوا غابة أرز تنورين العظيمة

بتحتوي هالمحمية على حوالي 60,000 شجرة أرز عمرن ميّات السنين وبيمتدوا على مساحة 600 هكتار، بتطل الغابة على وادي عين الراحة من جهة ووادي القديسين من الجهة التانية، وفيها أجمل دروب المشي اللي ممكن تجربوها بلبنان.

2. جربوا دروب المشي اللي بتوصلكن على ضفاف نهر الجوز

مجرد ما توصلوا على النهر وتتمشوا هونيك بتحسوا بأجمل شعور دخل على قلبكن، بتاخدوا نفس عميق وبتشموا الهوا النضيف.

بتروقوا راسكن على أروق بيكنيك بالطبيعة جنب النهر وعلى صوت المي، بتفرشوا الحصيرة تحت الشجر وبتشربوا قهوة طيبة، وبتسبحوا وبتبوردوا قلبكن بالميّ الباردة.

3. دوقوا أطيب مشاوي عند مطعم وادي الدير على نهر الجوز

هالمطعم من الأفضل بالمنطقة من ناحية الأكل الطيب وكمان من ناحية القعدة الساحرة جنب النهر والمخباية بالشجر، بتجربوا أطيب مشاوي وكفتة وسمك مع مازة لبنانية غير شكل! قعدة كتير مناسبة للعيل والجمعات الكبيرة وكمان بتلاقوا ألعاب للولاد.

للمزيد من المعلومات، اتصلوا على 563 523 03 – 563 523 71

4. عيشوا تجربة من العمر جنب شلالات بالوع بلعا الخيالية

هالمعلم الطبيعي عمرو ملايين السنين وبيجذب الناس ليجربوا القعدة والمنظر الساحر، بتحسوا بعظمة الخالق وأديه طبيعة لبنان رائعة الجمال، وكمان في كتير نشاطات حماسية بالمنطقة لتقضوا أحلى اللحظات مع أصحابكن.

5. كفوا مشواركن على Ô p’tit Gabriel وقضوا ليلة من العمر ببيوت ساحرة الجمال

هالبيت الضيافة مناسب لكل عشاق الطبيعة والمغامرة، قريب من وادي تنورين وكل المعالم الطبيعية الساحرة ودروب المشي بالمنطقة، قعدة عندن على البلكون وقدامكن عظمة تنورين كلها، عنجد منظر بيحبس النفس وبيخطف القلب، كمان موديل الغرف مودرن وحلو ومجهزة بكل شي ممكن تحتاجوا، بتقعدوا وما بتعتلوا هم شي!

للمزيد من المعلومات، اتصلوا على 713 561 70

شوفوا كمان، هيك فيكن تقضوا نهار حلو ببرج حمود

مقالات ذات صلة