لقينا أطيب مفتقة ببيروت

لما نقول مفتقة منكون عم نحكي عن أقدم نوع حلو بيروتي. أبوعبدالله، صاحب "حلويات المكاري" عالبسطة بيعمل شغلو بموهبة وفن.

مصنوع من الرز، الطحينة، السكر، العقدة الصفرا ومزين بالصنوبر، هالطبق بياخد عالقليلة أربع ساعات من التحضير مع حرك مستمر بصير أصعب وأصعب كل ما بتشتد الطبخة. أكلة بدا عضلات!

المكاري هوي من آخر محلات المفتقة بالمدينة ومعرف منيح محلياً. بلشت العيلة بهالمصلحة من أكتر من ١٠٠سنة. ورت الإبن الوصفة عن الأب، وولادو التانيين اعتمدوها هني كمان وفتحوا محلاتن الخاصة مش بعيد عن المحل الأساسي.

بيطبخ أبو عبد الله المفقتقة بكميات كريمة وبصبا بجاطات كبيرة وبديعة، متل عادة اللبنانية لما يقدموا وصفاتن المشهورة. المفقتة بتضاين تقريباً شهر بالبراد، فكونوا أكيدين إنكن رح تحتفظوا فيا لفترة بدون ما تضطروا تكبوا منا شي.

زوروه بشارع البسطة الرئيسي وتلذذوا بهالتحلاية الغير شكل. فيكن كمان تستفيدوا من خدمة التوصيل وتطلبوا المفتقة عالرقم: ٦٤٣٤٣٢- ٠١ وصحتين!

ترجمة: رنا قاروط