أجمل بيوت ضيافة بالشوف

كل شخص بحب يهرب من عجقة المدينة وضغط الشغل ليقضي يومين بالطبيعة يلي بتاخدنا على عالم تاني بيسحرنا بالهدوء والمناظر الطبيعية بين الشجر والغابات وتلال الجبال والوديان، وأحيان منتمنى نعيش حياة قروية لبنانية أباً عن جد وناكل أكل بلدي ونشم هوا نضيف ونستمتع بهالوقت الحلو، لهيك بدنا نعرفكن على بيوت ضيافة موجودة بالشوف بأمنولكن أحلى جو وأحلى قعدة لمدة يومين وأكتر.

١. سيزار غاست هاوس:

هالمكان موجود على تلة مليانة فرح وحب وموسيقى، بعيشنا بأجواء قروية رائعة، بهالمكان فينا نستلم مطبخ نحضر فيه ترويقتنا حسب اختيارنا يعني نقطف الخضرة وناخد بيض من عند الدجاج، ومافي أجمل من سهرة النار والموسيقى يلي بتجمع كل الموجودين، وبساعدونا نكتشف محمية أرز الباروك، هالمكان موجود بالباروك وكلفة الليلة ٣٥$ عالشخص شاملة الترويقة.

تلفون: ٧٦٧١١٨١١

٢. بكرزاي:

ضيعة بقلب ضيعة كل شي فيها طبيعي من الحجر والبيوت والأكل، هالمكان بيتميز بوجود حمام تركي ومدرسة فخار وفينا نعمل يوغا وهايكينغ بالإضافة لوجود البيسين، بكرزاي موجود ببعقلين وكلفة الليلة بتبلش من ١٢٠$ الى ٤٠٠$ شاملة الترويقة.

تلفون: ٠٣٥١٢٠٢٠

٣. بيت القمر:

نحن والقمر جيران ببيت القمر الموجود بدير القمر هالمكان بيجمع بين الحداثة والتراث وموجود فيه تراس بيجذب بالألوان المنعشة للطاولات والكراسي بالإضافة لوجود مطعم طاولة التابع لسوق الطيب، كلفة الليلة من ١٣٠$ الى ٢٥٠$ شاملة الترويقة.

تلفون: ٠٣٦٦١٤١١

٤. بيوتي:

هالمكان موجود بمعاصر بيت الدين، ويعتبر من البيوت المهمة بالشوف وبقدم أطيب ترويقة بلدية لبنانية، ويلي حابين يسبحوا كمان في بيسين ولا أجمل بالطبيعة بين الشجر، كلفة الليلة من ٢٠٠$ الى ٤٠٠$ شاملة ترويقة.

تلفون: ٠٣٣١٠٢٠٠

٥. رواء فيلدج:

حلو كتير الرواق بهيك مكان بعيد عن عجقة الناس والإستمتاع بالوقت مع الأصحاب والأهل، هالمكان المكنكن موجود بدير القمر و موقعه المميز بساعدنا نكتشف القرية وتاريخها المميز، كلفة الليلة من ١٠٠$ الى ١٦٥$ شاملة ترويقة.

تلفون: ٠٥٥١٢١٧٧