أطيب بوفيه مع منظر روعة: “طاولة باكيش” أخيراً وصلت على بسكنتا!

“شو طابخين ببسكنتا اليوم؟”

طاولة سوق الطيب جايي على بسكنتا!

من بعد ما وصلت طاولة لمار مخايل وعميق ودير القمر، صار فيكن تدوقوا أطيب الأطباق التراثية لسوق الطيب تحديداً بقناة باكيش بأحضان بسكنتا! الإفتتاحية السبت ب 3 حزيران من الساعة 12 ل 5 بعد الضهر على قعدة جبلية أصيلة.

تخايلوا قاعدين بجنينة تحت شجر التفاح والهوا عم يلعب لعب، قدامكن أجمل الجبال الكسروانية والمناظر الجبلية، عم تدوقوا لقمة بيتوتية من إيدن أشطر الطباخين ببسكنتا وعم تتعرفوا على أطباق المنطقة وأشهى الوصفات المحلية!

طاولة سوق الطيب مشهورة بتقديم أطيب الطبخات والأطباق المحلية والتراثية المتعارف عليها بقلب الضيع اللبنانية، معمولة على أصولها من تحت إيدان ناسها، طباخين وستات الضيع اللي لاقوا بطاولة سوق الطيب مطرح للتعبير عن حبّن للمطبخ اللبناني وتنوّع التراث اللبناني.

بيعتمدوا أسلوب المطبخ المفتوح، لتشوفوا طريقة التحضير قدامكن، تدوقوا أطيب الأطباق، تتعرفوا على ناس من مختلف أنحاء لبنان، وتتحدثوا مع الطباخين وتتعلّموا منن أشهى الوصفات المحلية.

طاولة باكيش بتفتح كل سبت وأحد وبالأعياد كمان، من الساعة 12 الضهر للساعة 5 بعد الضهر.

للحجز والمزيد من المعلومات، إتصلوا على 301 767 81.

شوفوا كمان، قعدة جنب البحر أو النهر؟ شوفوا هالمطاعم بالجنوب فوق الميّ