لمحبي الطبيعة، ١١ محمية بلبنان تكتشوفن بالخريف

ما بيكمل الخريف من دون مشوار بالطبيعة، وهالمقال تحديداً لمحبي التخييم، والمغامرة، والإكتشاف! تعرفوا معنا على 11 محمية و غابة بلبنان تكتشفوهن هالخريف.

1. محمية أرز الشوف، الشوف

أكبر محمية طبيعية بلبنان وفيها حوالي 25 % من غابات الأرز الباقية. عمر الشجر فيها بيعادل الـ 2000 سنة، عدا عن 500 نوع من النباتات وكتير منها النادر، وعدد من الحيوانات والزواحف. وتعتبر مقصد سياحي لكل محبي الـ Hiking وفيها كتير بيوت ضيافة.

2. غابة صنوبر بكاسين، جزين

أكبر غابة صنوبر بلبنان والشرق الأوسط، وفيها تنوع بيولوجي غني من النباتات الطبية والعطرية.

3. وادي قاديشا، بشري

يعتبر وادي قاديشا، أو الوادي المقدس، أعمق وادي بلبنان وبيتميز بإنحدارو القوي. عندو أهمية عند الديانة المسيحية بسبب تواجد كتير من الكنايس والكهوف بقلبو، عدا عن التنوع البيئي بالشجر والنباتات.

4. غابة العذر، القموعة

وحدة من أكبر غابات الشرق الأوسط وأجملها بالعالم مخباية بعكار، بتمتد من ضيعة فنيدق لسهل القموعة. بتتميّز غابة العذر بسحرها الطبيعي وتنوعها البيئي، من شجر السنديان والأرز والسرو وغيرها، وهي تعتبر مقصد لمحبي المغامرة والتخييم.

5. غابة أرز حدث الجبة، بشري

وحدة من أكبر شجر الأرز بلبنان والشرق الأوسط. فيها أنواع نادرة من شجر الأرز، عداً عن شجر السرو والسنديان والصنوبر والزيتون، وبتحدها نيحا وتنورين.

6. محمية حرش إهدن الطبيعية، إهدن

وحدة من أهم المحميات بالشمال، غنية بأنواع مختلفة من الشجر الحرجي والتنوع البيئي من حيوانات ونباتات.

7. محمية وادي الحجير الطبيعية، النبطية

بتتميز محمية وادي الحجير بمناظرها الطبيعية وغاباتها الغنية بشجر الزيتون المعمّر، الصنوبر، السنديان، الخروب، وكمان بالتنوع البيولوجي من نباتات طبية وعطرية، وبتمتد على مساحة واسعة بالجنوب، من النبطية لمرجعيون وبنت جبيل.

8. محمية أرز تنورين الطبيعية، تنورين

وحدة من أكبر غابات الأرز وأكترها كثافة بلبنان، ومقصد أساسي لمحبي التخييم والتلج بالشتوية.

9. غابة أرز بشري، بشري

كمان وحدة من أكبر وأهم غابات الأرز بلبنان والشرق الأوسط، بتتميز بتواجد أقدم شجر الأزر فيها، ومقصد سياحي أساسي لمحبي التزلج.

10. محمية جبل موسى الطبيعية، يحشوش

محمية جبل موسى من أجمل المحميات بلبنان، وفيها تنوع بيولوجي غني وفريد. بتتضمن بحيرة شوان اللي هي مقصد لكل محبي الطبيعة و التخييم.

11. محمية أرز جاج الطبيعية، جبيل

محمية مميزة بمنطقة جبيل وعندها طبيعة نادرة ومشاهد خلابة. بتحتوي على تنوع بيولوجي وجيولوجي، من نبات وشجر متل الأرز واللزاب.

خبرونا، حبيتوا المشوار على أجمل المحميات الطبيعية بلبنان؟

شوفوا كمان، مطاعم بأحلى قعدة بين وراق الخريف