أخيراً، فيكن تطلبوا من AliExpress ع لبنان عبر ليبان بوست!

خبر حلو لكل اللي كانوا مشتاقين يتسوّقوا من AliExpress: صار فيكن تطلبوا يلي بدكن ياه من المنصة وهالمرة من خلال خدمة ليبان بوست. يعني فيكن تطلبوا أغراضكن أونلاين من AliExpress، وتوصل الشحنة لعند باب البيت عبرLiban Post.

الخدمة بتعتمد على عنوان ليبان بوست بالإمارات، بحيث بتطلبوا من AliExpress من خلال هالعنوان، وبعدها بتتكفّل ليبان بوست بنقل الشحنة من الإمارات للبنان وتوصيلها لعندكن. وطلبكن بيوصل خلال حوالي 10 أيام.

كيف تطلبوا من AliExpress؟

1. فوتوا على تطبيق AliExpress.
2. غيّروا البلد ل الإمارات العربية المتحدة (UAE).
3. غيّروا العملة ل الدولار ($) واللغة ل English.
4. عند إدخال عنوان الشحن، اكتبوا المعلومات بهالشكل (شوفوا الصورة تحت)
   • الاسم: اسمكن الكامل  +” C/o Liban Post” بدل اسم العائلة
   • رقم الهاتف: 2460 102 51 971+
   • العنوان: Dubai, Ras Al Khor 10C St, Warehouse 2
   • بخانة Apartment / Suite / Other، اكتبوا عنوانكن بلبنان مع رقم تلفونكن.
   • State / Province: Dubai
   • ZIP Code: 0000
5. كمّلوا طلبكن على AliExpress.
6. بعد وصول الشحنة ع مركز ليبان بوست بالإمارات، بتتكفّل الشركة بنقلها ع لبنان وتوصيلها لعند باب البيت.

انتبهوا لهالنقطة!

ممكن تنفرض رسوم جمركية من الجمارك الإماراتية، وإذا ما اندفعت الرسوم المطلوبة، المستلم بيخسر حقّه بالمطالبة بالشحنة أو استلامها.

كمان، عند التسليم بلبنان، ممكن تنضاف رسوم إضافية، وتشمل كلفة الشحن من الإمارات، الرسوم الجمركية اللبنانية ورسوم التوصيل إلى المنزل. يعني قبل ما تأكدوا الطلبية، خدو بعين الاعتبار إنو السعر النهائي ممكن يكون أعلى من السعر الظاهر على AliExpress.

وللمزيد من المعلومات، فيكن تتواصلوا مع ليبان بوست على الرقم 1577.

شوفوا كمان:

البحر إلكن لحالكن وبس ب 10$ عند هالجوهرة بالشمال!