فرن بيروتي عم يعمل منقوشة برغر بتشهي!

لكل محبي الأكل، اليوم رح نخبركن عن أكلة إستثنائية! فرن Baked In Beirut بقلب الجميزة عندو طعمات مميزة من المناقيش، وصار عندن شي جديد على المنيو: منقوشة برغر.

من الصعب تلاقوا حدا  ما بيحب المناقيش أو البرغر، و هالأكلة بتجمع بين هالشغلتين الطيبين. وفرن Baked In Beirut بيحب يسميها برغر بعجين، عبارة عن قطعة لحمة طرية بين طبقات عجينة المنقوشة السخنة، مع الجبنة الدايبة والخضرة الطيبة. وأحلى شي انو بتزبط معكن تجربوها على الترويقة، البرانش، أو الغدا. 

وإذا عبالكن شي غير وطيب، هالفرن عندو مناقيش ومخبوزات مميزة من كل الأصناف لازم تجربوها مع أصحابكن أو الصبح قبل ما تروحوا على الشغل. بيقدملكن منيو متنوعة من المناقيش التقليدية، بس لازم تجربوا عندو المناقيش بنكهات أرمنية أصيلة. جربوا لحم بعجين على الطريقة الأرمنية أو المنقوشة الأرمنية بطعمة الحر، أكيد بس إذا انتو قدها! 

بس إذا كنتو عم تدوروا ع شي دسم، عندن منقوشة الشكشوكة ريحتها ومنظرها بيشق القلب، رح تنغرموا فيها!

بتلاقوا فرن Baked In Beirut بالجميزة، بيفتح من الساعة 7 الصبح للساعة 11 المسا، ما عدا يوم الأحد بيفتح ل 3 الضهر. للمزيد من المعلومات، اتصلوا على 856 660 03 – 798 711 76، أو تابعوا حسابن على الإنستغرام هون. 

خبرونا شو رأيكن، بتجربوا منقوشة برغر؟ ومين بتعزموا عليها؟

شوفوا كمان، غنجوا ولادكن بأطيب دوناتس الطربوش من هالمحل!